Վերաքննիչ քրեական դատարանում՝ նախագահությամբ դատավոր Անդրանիկ Մնացականյանի, րոպեներ առաջ մեկնարկեց Գագիկ Խաչատրյանի եղբորորդու՝ Կարեն Խաչատրյանի նկատմամբ կալանավորումը որպես խափանման միջոց ընտրելու դեմ բողոքի քննությունը:

Խաչատրյանը, կալանավորվել է օգոստոսի 30-ին՝ առաջին ատյանի դատավոր Ռոբերտ Պապոյանի որոշմամբ:

Վերաքննիչ դատարանում կալանքի դեմ բողոքի գործով ավելի վաղ մեկ դատական նիստ է տեղի ունեցել, որը հետաձգվել է, և սա գործով երկրորդ նիստն է:

Կարեն Խաչատրյանը նախկինում աշխատել է ՊԵԿ-ում, մեղադրվում է առանձնապես խոշոր չափով վատնում կատարելու մեջ: Ազգային անվտանգության ծառայությունը ձերբակալել է օգոստոսի 27-ին: ԱԱԾ-ում հարուցված քրեական գործի շրջանակներում մեղադրանք է առաջադրվել նաև նրա հորեղբորը՝ ՊԵԿ նախկին նախագահ, ֆինանսների նախկին նախարար Գագիկ Խաչատրյանին: Վերջինս մեղադրվում է պաշտոնեական դիրքի չարաշահման և առանձնապես խոշոր չափով վատնում կատարելու մեջ: Օրեր առաջ Վերաքննիչ դատարանը քննել է նաև Գագիկ Խաչատրյանի խափանման միջոցը կալանավորումն ընտրելու վերաբերյալ բողոքն ու օրինական համարել նրան կալանավորելու առաջին ատյանի դատարանի որոշումը:

Քրեական գործն առնչվում է Գագիկ Խաչատրյանի՝ ՊԵԿ նախագահ եղած ժամանակաշրջանում շուրջ 210 մլն դրամ գումար վատնելուն: