Նախկին ոստիկանապետ Հայկ Հարությունյանի ցուցմունքն այնքան ճիշտ էր, որ հենց երկրորդ նախագահ Ռոբերտ Քոչարյանին էր պետք, որ նա գար դատարան՝ ցուցմունք տալու։ Այս մասին այսօր Ռոբերտ Քոչարյանի և մյուսների վերաբերյալ դատական նիստից առաջ լրագրողների հետ զրույցում ասաց երկրորդ նախագահ Ռոբերտ Քոչարյանի որդին՝ Լևոն Քոչարյանը։ Նա նշեց, որ վերջին անգամ հոր հետ հանդիպել է հոկտեմբերի 2-ին. հայրը շատ է ցավում Հարությունյանի մահվան կապակցությամբ:

«Հայկ Հարությունյանն այն մարդկանցից էր, ում հայրս շատ է գնահատել, նա շատ պարկեշտ անձնավորություն է եղել, իր գործը ճշգրիտ կատարող, այն կերպարը չէր, որ սխալ բաների մեջ թաթախված լիներ, այդ մարդն իր գործը փայլուն կատարում էր։ Հայրս եղածի համար շատ է ցավում»,-ասաց Լևոն Քոչարյանը:

Հայկ Հարությունյանի մահվանից հետո, ինչպես հայտնի է, քննարկման առարկա է դարձել նաև այն հանգամանքը, որ նրա մահը ձեռնտու էր Քոչարյանին, որպեսզի չգար և դատարանում ցուցմունք չտար: Այս հանգամանքին անդրադառնալով՝ Լևոն Քոչարյանը նշեց, թե Հարությունյանի նախաքննական ցուցմունքի բովանդակությունը հայտնի է դարձել հանրությանը, և դրան ծանոթանալով՝ նման հետևության չի կարելի գալ:

«Հայկ Հարությունյանի ցուցմունքն էնքան լավ, ճիշտ ու իրականությանը համապատասխանում է, որ հենց մեզ էր պետք, որ Հայկ Հարությունյանը գար ու ցուցմունք տար։ Ցուցմունքները հասանելի են բոլորին, այնտեղ Հայկ Հարությունյանը նշել է Ռոբերտ Քոչարյանի խոսքերն այն մասին, որ ամեն ինչ այնպես պետք է արվի, որ հանկարծ մարդ չվնասվի, ճնշումներ չլինեն, չկիրառվի ուժ»,- ասաց Լևոն Քոչարյանը:

Անդրադառնալով դատավոր Աննա Դանիբեկյանի հետ սեպտեմբերի 27-ին տեղի ունեցած միջադեպին՝ Լևոն Քոչարյանը նշեց, որ քննարկել կարելի է՝ արդյոք արժեր նման բան անել, թե՝ ոչ, բայց իրավական հարթության մեջ այս հարցին անդրադառնալիս ակնհայտ է դառնում Հայաստանում երկակի ստանդարտների կիրառումը:

Հիշեցնենք, որ սեպտեմբերի 27-ին Նարեկ Մութաֆյանը քայլել է դատավոր Աննա Դանիբեկյանի հետևից ու նրան հարցրել, թե արդյոք կա «վնգստացող դատավորների» ցանկում, որոնց մասին խոսել է վարչապետ Նիկոլ Փաշինյանը:

Լևոն Քոչարյանը հիշեցրեց, որ մինչև դատավոր Դանիբեկյանի հետ տեղի ունեցած միջադեպը անհարգալից վերաբերմունքի և ֆիզիկական բռնության դեպքեր են եղել, որոնց պատշաճ իրավական գնահատական չի տրվել: