Կառավարության նիստի մեկնարկին վարչապետ Նիկոլ Փաշինյանը գործադիրի անդամներին տեղեկացրեց, որ երեկ Թուրքիայի զինված ուժերը ներխուժել են Սիրիայի Արաբական Հանրապետություն․ «Հայաստանի Հանրապետությունը դատապարտում է ներխուժման այդ գործողությունը, և մենք մտահոգված ենք իրավիճակով, որովհետև մեր գնահատմամբ՝ այդ գործողությունը ավելի կխորացնի Սիրիայում հաստատված մարդասիրական ճգնաժամը։ Մենք կոչ ենք անում միջազգային հանրությանը գործուն միջոցներ ձեռնարկել այդ ապօրինի գործողությունը դադարեցնելու և Թուրքիայի սահմանի երկայնքով Սիրիայի քաղաքացիներին, այդ թվում՝ ազգային փոքրամասնություններին և նրանց իրավունքները պաշտպանելու ուղղությամբ»,- ասաց վարչապետը։

Փաշինյանը ընդգծեց, որ Հայաստանը Հալեպում իրականացնում է մարդասիրական առաքելություն, որը շարունակելու է։ Նրա առաջարկությամբ Կառավարության նիստի օրակարգը սպառելուց հետո փակ ռեժիմով քննարկում կիրականացվի՝ Սիրիայի հյուսիսում հնարավոր զարգացումների և Կառավարության դիրքորոշումների վերաբերյալ։