«Թուրքիան համաձայնել է հրադադար հաստատել Սիրիայի հյուսիսում, որպեսզի թույլ տա քրդերի կողմից ղեկավարվող ուժերը դուրս բերել»,- հայտարարել է ԱՄՆ փոխնախագահ Մայք Փենսը:

Ինչպես գրում է բրիտանական «Բիբիսին», բոլոր ռազմական գործողությունները կդադարեցվեն հինգ օր, և ԱՄՆ-ն կօգնի հեշտացնել քրդերի կողմից ղեկավարվող զորքերի «պատշաճ դուրսբերումը» այն վայրից, որը Թուրքիան անվանում է «անվտանգ գոտի»:

Հիշեցնենք, որ Թուրքիան իր հարձակումը քրդերի վրա սկսեց անցած շաբաթ:

Այն նպատակ ուներ հետ մղել քրդական զորախմբին, որը նա դիտում է որպես ահաբեկչական խմբավորում և վերաբնակեցնել սիրիացի փախստականներին այդ տարածքում:

«Բիբիսիի» հաղորդմամբ՝ քննադատները վախենում են, որ դա կարող է հանգեցնել տեղի քուրդ բնակչության էթնիկ զտումների:

Միջսահմանային հարձակումը տեղի ունեցավ այն բանից հետո, երբ ԱՄՆ նախագահ Դոնալդ Թրամփը ԱՄՆ ուժերը դուրս բերեց սահմանային տարածաշրջանից:

Նրա որոշումը քննադատության տեղիք տվեց ինչպես ԱՄՆ-ում, այնպես էլ արտերկրում, և ոմանք նրան մեղադրում են թուրքական գործողության համար «կանաչ լույս» տալու համար:

Դոնալդ Թրամփը Թվիթերում գրառում է կատարել հրադադարի մասին մինչ Փենսի հայտարարությունը՝ գրելով, որ «միլիոնավոր կյանքեր կփրկվեն»: