HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Դատախազությունը հրաժարվեց ՔԿ Էրեբունու քննչական բաժնի պետի տեղակալ Բունիաթ Եղիազարյանին արդարացնելու դատավճռի դեմ բողոքից

Վերաքննիչ քրեական դատարանում՝ նախագահությամբ դատավոր Մհեր Արղամանյանի, դատավորներ Ալեքսանդր Ազարյանի և Նարինե Հովակիմյանի, այսօր նշանակված էր Քննչական կոմիտեի Էրեբունու քննչական բաժնի պետի նախկին տեղակալ Բունիաթ Եղիազարյանին արդարացնելու դատավճռի դեմ բողոքի քննությունը: Նիստի մեկնարկին, սակայն դատախազ Արա Մնացականյանը հայտնեց, որ դատախազությունը հրաժարվում է Եղիազարյանին արդարացնելու առաջին ատյանի դատավճռի դեմ ներկայացված վերաքննիչ բողոքից:

Նախագահող դատավոր Մհեր Արղամանյանը նշեց, որ նման պայմաններում վերաքննիչ վարույթը պետք է կարճվի, որոշումը կողմերին կտրամադրվի լրացուցիչ:

Հիշեցնենք, որ Երևան քաղաքի ընդհանուր իրավասության դատարանը` նախագահությամբ դատավոր Կարեն Ֆարխոյանի, առանձնապես խոշոր չափով կաշառք ստանալու մեջ մեղադրվող Բունիաթ Եղիազարյանին արդարացրել էր 2019 թվականի հուլիսի 16-ի դատավճռով, որի դեմ դատախազությունը բողոք էր ներկայացրել:

Եղիազարյանի մեղադրանքը վերաբերում էր քննիչ Միքայել Զադոյանի հետ քաղաքացի Բաբկեն Գասպարյանից կաշառք վերցնելուն:

Գասպարյանը ԱԱԾ-ում հաղորդում է տվել այն մասին, որ որդու վերաբերյալ քրեական գործի շրջանակներում փաստաբան Գայանե Գալոյանի միջոցով 3000 ԱՄՆ դոլար կաշառք է տվել Էրեբունու քննչական բաժնում: Հարուցված քրեական գործի շրջանակներում մեղադրանք է առաջադրվել հաղորդում ներկայացրած Բաբկեն Գասպարյանին, փաստաբան Գայանե Գալոյանին, Էրեբունու քննչական բաժնի քննիչ Միքայել Զադոյանին, որը եղել է Գասպարյանի որդու՝ Սոս Գասպարյանի գործով քննիչը, ու Բունիաթ Եղիազարյանին, որը, ինչպես արդեն նշեցինք, եղել է Էրեբունու քննչական բաժնի պետի տեղակալը:

Բունիաթ Եղիազարյանի գործը քննվել է Միքայել Զադոյանի, Բաբկեն Գասպարյանի և Գայանե Գալոյանի գործից առանձին:

Կաշառքի գործով մեղադրյալի կարգավիճակ ստանալուց հետո Բունիաթ Եղիազարյանի լիազորությունները կասեցվել են: Եթե նրա վերաբերյալ արդարացման դատական ակտը մտնի օրինական ուժի մեջ, նա իրավունք կունենա շարունակելու աշխատանքը Քննչական կոմիտեում:

Նշենք, որ Միքայել Զադոյանի, Գայանե Գալոյանի և Բաբկեն Գասպարյանի վերաբերյալ գործի քննությունն առաջին ատյանի դատարանում ևս ավարտվել է:

Դատարանը Միքայել Զադոյանին մեղավոր է ճանաչել կաշառք ստանալու մեջ ու դատապարտել 7 տարի ազատազրկման:

Փաստաբան Գայանե Գալոյանը մեղավոր է ճանաչվել կաշառքի միջնորդության, իսկ Բաբկեն Գասպարյանը՝ կաշառք տալու մեջ: Միքայել Զադոյանն ու Գայանե Գալոյանը իրենց առաջադրված մեղադրանքը չեն ընդունել:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։