Վերաքննիչ քրեական դատարանը՝ նախագահությամբ դատավոր Լուսինե Աբգարյանի, քիչ առաջ հեռացավ խորհրդակցական սենյակ՝ «Մուլտի գրուպ» ընկերության տնօրեն Սեդրակ Առուստամյանի խափանման միջոցի գործով որոշում կայացնելու, որը կհրապարակվի հոկտեմբերի 28-ին: Այս մասին նիստի ավարտից հետո ասաց Առուստամյանի փաստաբան Դավիթ Մանթաշյանը:

Լրագրողների մի քանի հարցերին պատասխանեց նաև Սեդրակ Առուստամյանը: Հարցին՝ Առուստամյանի կանխատեսմամբ դատարանն ի՞նչ որոշում կկայացնի, Առուստամյանը պատասխանեց. «Ես Նոստրադամուսը չեմ, վստահ եմ, որ ազնիվ եմ, ոչ մի հանցագործություն չեմ գործել, ու վստահ եմ, որ դատարանը ճիշտ որոշում կընդունի»:

Լրագրողները հետաքրքրվեցին՝ Առուստամյանն իր հետ տեղի ունեցող իրադարձությունների մեջ ենթատեքստ չի՞ տեսնում:

«Ես քաղաքականությամբ երբեք չեմ զբաղվել»,- ասաց նա:

Այսօր Առուստամյանը դատարան էր եկել ձեռնափայտով, ասաց, որ պատճառն ոտքի վիրահատությունն է:

Սեդրակ Առուստամյանը, հիշեցնենք, մեղադրյալ է «Հյուսիս-Հարավի գործով»: Նրան մեղադրանք է առաջադրվել Քրեական օրենսգրքի 190-րդ հոդվածի 3-րդ մասի 1-ին կետով, 38-189-րդ հոդվածի 3-րդ մասով, 38-205-րդ հոդվածի 2-րդ մասով նախատեսված հանցավոր արարքներ կատարելու մեջ:

Խոսքը փողերի լվացման, խոշոր չափով հարկերից խուսափելու և կեղծ ձեռնարկատիրությամբ զբաղվելու կամ այդ հանցավոր արարքների կատարումը կազմակերպելու մասին է:

Քննչական կոմիտեն մեկ ամիս առաջ նրան մեղադրանք էր առաջադրել և կալանավորելու միջնորդություն ներկայացրել: Դատարանը, սակայն, որոշել էր նրան 20 մլն դրամ գրավի դիմաց ազատ արձակել: Այս որոշումը դատախազությունը բողոքարկել է: