Արտակարգ իրավիճակների (ԱԻ) նախարար Ֆելիքս Ցոլակյանն ինքն է խնդրել վարչապետին, որ պետական վերահսկողական ծառայությունը ստուգումներ իրականացնի ԱԻՆ-ում:

Այս մասին խորհրդարանում` լրագրողների հետ զրույցում ասաց ԱԻ նախարար Ֆելիքս Ցոլակյանը:

«Աշխատանքից ազատել ենք մարդկանց կամ ավելի ճիշտ մարդու, որը բողոքել է, որ խախտումներ կան ԱԻՆ-ում: Փրկարար ծառայության տնօրենին եմ ազատել, որից հետո այս խոսակցությունը եղել է»,-ասաց Ցոլակյանը:

Նախարարը, սակայն, վստահեցրեց` բացառում է, որ որևէ ֆինանսական խախտում լինի:

Ցոլակյանի խոսքով` հավանաբար ստուգումները մի քանի օրից ավարտված կլինեն:

Մեր հարցին, թե ինչում է թերացել փրկարար ծառայության տնօրենը, որ ազատվել է պաշտոնից, Ֆելիքս Ցոլակյանը պատասխանեց. «Ամառվա հրդեհների ժամանակ անտարբեր է եղել, դա հիմնական պատճառներից մեկն է, Հայաստանում չի եղել»:

Ինչ վերաբերում է այն հրապարակումներին, որ իր մտերիմներին է համակարգում աշխատանքի ընդունում, Ցոլակյանը վստահեցրեց, որ բարեկամ չունի ԱԻՆ-ում` չնայած հարազատները դիմում են, սակայն որևէ մեկին չի ընդունել:

«Ես ընդունել եմ ծանոթներիս, որոնց ճանաչել եմ և որոնց գալուց հետո փոփոխություններ են եղել համակարգում»,- ասաց նա:

Ինչ վերաբերում է ուղղաթիռ ձեռք բերելու հնարավորությանը՝ նախարարն ասաց, որ քննարկում են ՊՆ-ի հետ համատեղ այդ ծրագիրն իրագործելը: