Երևան քաղաքի ընդհանուր իրավասության դատարանը՝ նախագահությամբ դատավոր Դավիթ Բալայանի, մերժեց Պետական վերահսկողական ծառայության (ՊՎԾ) պետ Դավիթ Սանասարյանի (լիազորությունները ժամանակավորապես դադարեցված են) և մյուսների վերաբերյալ գործի վարույթը կասեցնելու և Սահմանադրական դատարան (ՍԴ) դիմելու՝ Սանասարյանի պաշտպան Ինեսսա Պետրոսյանի միջնորդությունը: Պաշտպան Ինեսսա Պետրոսյանը, հիշեցնենք, միջնորդություն էր ներկայացրել՝ նշելով, թե ԱԱԾ քննչական դեպարտամենտը, որն իրականացրել է այս քրեական գործի նախաքննությունը, հակասահմանադրական մարմին է:

Ըստ Սանասարյանի պաշտպաններ Պետրոսյանի և Արսեն Սարդարյանի՝ ԱԱԾ քննչական մարմնի կարգավիճակը և կազմավորման կարգը պետք է սահմանվեր «Ազգային անվտանգության մարմինների մասին» օրենքով, մինչդեռ, ԱԱԾ քննչական դեպարտամենտի կանոնադրությունն ու կառուցվածքը հաստատվել է միայն վարչապետի որոշմամբ, ինչը հիմք է տալիս պնդել, որ ԱԱԾ քննչական դեպարտամենտը հակասահմանադրական է։

Միջնորդությունը մերժելու մասին որոշումը կողմերին կտրամադրվի 2 օրվա ընթացքում, մինչ այդ դատավորը հակիրճ պարզաբանեց որոշման հիմքում դրված հանգամանքները:

Դատավորի խոսքով՝ Քրեական դատավարության օրենսգրքով նախատեսված են քննիչի լիազորությունները, քննչական մարմնի կարգավիճակը, ինչ վերաբերում է քննչական մարմնի կազմավորման կարգին, Բալայանը նշեց, որ ԱԱԾ մարմինների մասին օրենքի 4-րդ հոդվածի 3-րդ մասով՝ լիազորված մարմնի համակարգում, այսինքն՝ ԱԱԾ-ում, գործում են մի քանի մարմիններ՝ այդ թվում քննչական: Նույն օրենքը վարչապետին լիազորել է որոշելու ԱԱԾ-ի կազմն ու կառուցվածքը, ինչը վարչապետն արել է՝ օգտվելով իր լիազորությունից: Բացի այդ, Բալայանի խոսքով՝ քրեական դատավարության օրենսգրքի 31-րդ հոդվածի 2-րդ մասը սահմանում է, ոի դատարանը պարտավոր է դիմել ՍԴ, եթե գտնում է, որ կիրառման ենթակա օրենքը առերևույթ հակասում է ՀՀ սահմանադրությանը, սակայն կոնկրետ այս դեպքում դատարանը նման հետևություն չի արել: