Խորհրդարանն առաջին ընթերցմամբ ընդունեց ԱԺ փոխխոսնակ Լենա Նազարյանի հեղինակած «Տեղական ինքնակառավարման մարմինների մասին» օրենքում փոփոխություն կատարելու առաջարկը:

Նախագիծն ընդունվեց 93 կողմ, 2 դեմ և 14 ձեռնպահ ձայների հարաբերակցությամբ:

Փոփոխություններով առաջարկվում է, որ հրապարակվեն տեղական ինքնակառավարման մարմինների մշակած նորմատիվ ակտերի նախագծերը, ընդլայնվեն համայնքների կայքերում ներբեռնվող տեղեկությունների տեսակները, ինչպես` համայնքային կառույցների՝ կրթական, մշակութային, վերաբերյալ տեղեկությունները, համայնքում իրականացվող շինարարության մասին տեղեկությունները, այնպես էլ՝ համայնքապատկան գույքի մասին տեղեկություններ: Ըստ Լենա Նազարյանի` այս փոփոխությունները միտված են ընդլայնելու տեղական ինքնակառավարման մարմինների հրապարակային գործունեության դաշտը:

Նախագիծը դեռևս պետք է քննարկվի երկրորդ ընթերցմամբ: