Վերաքննիչ քրեական դատարանում՝ նախագահությամբ դատավոր Մխիթար Պապոյանի, քիչ առաջ սկսվեց Հայաստանի երկրորդ նախագահ Ռոբերտ Քոչարյանի խափանման միջոցի գործով վերաքննիչ բողոքի քննությունը: Նիստի մեկնարկին մեղադրող դատախազ Գևորգ Բաղդասարյանն ինքնաբացարկի միջնորդություն ներկայացրեց դատավոր Մխիթար Պապոյանին, որին միացան գործով մյուս դատախազ Պետրոս Պետրոսյանը, տուժող կողմն ու նրանց փաստաբաններ Սեդա Սաֆարյանը, Արա Ղարագյոզյանը:

Բաղդասարյանը, հղում կատարելով «ժողովուրդ» օրաթերթում եղած հրապարակմանը, հիշեցրեց՝ 2019-ի մայիսի 21-ին դատավորի աշխատակազմից հայտնել են, որ Պապոյանը հանցագործության մասին հաղորդում է տվել:

Պատճառն, ըստ հրապարակման, եղել է այն, որ 2019 թվի մայիսի 20-ին, «Facebook» սոցիալական ցանցի օգտատեր Արտակ Գալստյանն իր էջում հետևյալ վերտառությամբ հրապարակում է տեղադրել. «Ովքե՞ր են գրել Ռոբերտ Քոչարյանի ազատ արձակման որոշումը»:

Նշենք, որ այս հրապարկման մեջ խոսվում է այն մասին, որ Ռոբերտ Քոչարյանին ազատ արձակելու որոշումը գրել են Վերաքննիչ դատարանի երեք դատավորներ, որոնց թվում՝ Մխիթար Պապոյանը: Վերջինս հայտնել է, որ հրապարակումն ամբողջությամբ սուտ է:

Տուժող կողմի ներկայացուցիչ Սեդա Սաֆարյանն էլ նշեց, որ դատավոր Մխիթար Պապոյանն ընկերական հարաբերություններ ունի Քոչարյանին մոտ մեկ տարի առաջ կալանքից անձեռնմխելիության հիմքով ազատ արձակած դատավոր Ալեքսանդր Ազարյանի հետ: Մխիթար Պապոյանը պարզաբանեց, որ դատավորի հետ ընկերական հարաբերություններ ունենալը չի նշանակում, որ ինքը չի կարող չհամաձայնել նրա կայացրած որևէ դատական ակտի հետ: Պապոյանն ի գիտություն նշեց, որ այն ժամանակ, երբ Ալեքսանդր Ազարյանը դեռևս առաջին ատյանի դատարանի դատավոր էր, ինքը՝ որպես Վերաքննիչ դատարանի դատավոր, բեկանել է նրա կողմից կայացված դատական ակտերը՝ չհամաձայնելով դրանց հետ:

Ներկայացված ինքնաբացարկի միջնորդության դեմ առարկելով՝ Քոչարյանի պաշտպաններից Հայկ Ալումյանը նշեց, որ ներկայացված միջնորդության հիմքում դրված հանգամանքը ոչ թե պատճառ, այլ պատրվակ է՝ Պապոյանին ինքնաբացարկի միջնորդություն ներկայացնելու համար:

Ըստ Հայկ Ալումյանի՝ սա միջնորդություն է՝ գործը դատավոր Արմեն Դանիելյանին փոխանցելու վերաբերյալ: Նշենք, որ Դանիելյանն այն դատավորն է, որը բեկանել է Քոչարյանին երկրորդ անգամ կալանքից ազատելու որոշում կայացրած դատավոր Դավիթ Գրիգորյանի որոշումն ու Քոչարյանին նորից կալանավորելու որոշում կայացրել:

Ալումյանը նաև նշեց, որ երկու երիտասարդների վերաբերյալ մեկ այլ քրեական գործ, որը վերաբերում է դատավոր Աննա Դանիբեկյանին, կապվում է նաև Ռոբերտ Քոչարյանի հետ, սակայն դատախազներն այդ հիմքով ինքնաբացարկի միջնորդություն չեն ներկայացրել դատավոր Դանիբեկյանին, ով քննում է Ռոբերտ Քոչարյանի գործը: Խոսքը Նարեկ Մութաֆյանի և Սարգիս Օգանջանյանի գործի մասին է: Վերջիններս մեղադրվում են Ռոբերտ Քոչարյանի գործով դատավոր Աննա Դանիբեկյանի նկատմամբ ճնշում գործադրել փորձելու և այդպիսով արդարադատության իրականացմանը խոչընդոտելու մեջ: