«Այս մոլորակի վրա կա 2 հայկական պետություն, և երկուսում էլ ես ղեկավար եմ եղել: Ես ցանկություն չունեի ելույթ ունենալու, բայց քանի որ հնչեց բառակապակցություն այն մասին, որ ես վտանգ են երկայացնում մեր պետականությանը, դրա համար մի փոքր կհեռանամ իրենց բողոքից:

Այս մասին Վերաքննիչ դատարանում գրավի դիմաց իրեն ազատ չարձակելու որոշման դեմ վերաքննիչ բողոքի քննության ժամանակ ասաց Հայաստանի երկրորդ նախագահ Ռոբերտ Քոչարյանը:

Նշենք, որ պետականությանը վտանգ ներկայացնելու մասին հայտարարությունն արել էր տուժողի կողմի ներկայացուցիչներից մեկը:

Քոչարյանը նշեց, որ ինքը ԼՂՀ-ն ղեկավարել է ամբողջ պատերազմի ժամանակ, այդ երկրի հռչակագրի հեղինակն է, 88 թվականից մինչև երկրի ձևավորումը որևէ որոշում չի կայացվել առանց իրեն:

«Տասը տարի եղել եմ Հայաստանի Հանրապետության նախագահ: Մինչև իմ՝ նախագահ լինելը ՀՀ-ն դասվում էր աղքատ երկրների շարքին»,- խոսում էր Քոչարյանը, երբ հայտարարությանը առարկեց տուժողների ներկայացուցիչ Սեդա Սաֆարյանը:

Փաստաբանը նշեց, որ Քոչարյանի ելույթը բողոքի հետ կապ չունի: Հետո դատարանի դահլիճում իրարանցում սկսվեց. միմյանց հետ սկսեցին վիճաբանել Քոչարյանի աջակիցներն ու ընդդիմադիրները:

Դատարանը կարգադրեց դահլիճից հեռացնել աղմկող անձանց ու մի քանի հոգի հեռացվեց:

Հետո Քոչարյանը շարունակեց ելույթը:

«Մի դատական նիստի ժամանակ այս նույն քաղաքացին ինձ մեղադրել է իր կնոջ՝ ինֆարկտից մահվան մեջ: Ես ի՞նչ կապ ունեմ դրա հետ: Ես ասում եմ՝ իմ նախագահության ժամանակ ՀՀ-ն դարձել է միջին եկամուտներ ունեցող երկիր, և դա պահպանվել է մինչ օրս:

Եթե այս արդյունքները ունեցող մարդը համարվում է վտանգ պետականությանը, ուրեմն էլ ի՞նչ ասեմ, ուրեմն մենք մանկուրտների երկիր ենք»,- ասաց Քոչարյանը: