HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Հերգնյան

2020 թվականին Հայաստանի պետական պարտքը 162 մլրդ դրամով կաճի

2020 թվականին Հայաստանը պետական բյուջեով նախատեսված գործառնություններն իրականացնելու համար 440 մլրդ դրամի պարտք է ներգրավելու։ Միաժամանակ՝ մոտ 281 մլրդ դրամ էլ ուղղելու է ավելի վաղ վերցված պարտքերի մարմանը։

Այս մասին տեղեկանում ենք Ֆինանսների նախարարության ներկայացրած 2020 թվականի փոխառությունների ծրագրից։ Սա երկրի համախառն ֆինանսական կարիքի չափն է եկող տարվա համար։ Դրանով լրացվելու է բյուջեի պակասուրդը, սպասարկվելու է պետական պարտքը։

Հայաստանի 2020 թվականի պետական բյուջեի հաստատված ծրագրի համաձայն՝ բյուջեի եկամուտները կազմելու են 1 տրլն 695 մլրդ դրամ, որի մեծ մասը լինելու է հարկային եկամուտները։ Ծախսերը ծրագրված են 1 տրլն 855.7 մլրդ դրամ։ Արդյունքում բյուջեն ունենալու է 160.7 մլրդ դրամի պակասուրդ, որը կկազմի ՀՆԱ-ի 2.3 %-ը։

Վերևում նշված 440 մլրդ դրամից 168 մլրդ դրամն ուղղվելու է պետական պարտքի տոկոսավճարներին, 280.6 մլրդ դրամը՝ մայր գումարի մարումներին։ Զուտ ֆինանսական ակտիվների և մուրհակների մարմանը կհատկացվի 1.3 մլրդ դրամ։

Համախառն ֆինանսական կարիքի 61 %-ը նախատեսվում է ապահովել ներքին ռեսուրսների հաշվին։ Մասնավորապես, կիրականացվի 268 մլրդ դրամի պետական գանձապետական պարտատոմսերի տեղաբաշխում, որից մուտքը կկազմի 268.2 մլրդ դրամ։ Խոսքը ներքին պետական պարտքի մասին է, որի գծով եկող տարի նախատեսվում է նաև 123.3 մլրդ դրամի մայր գումարի մարմումներ կատարել։

Ինչ վերաբերում է արտաքին փոխառություններին, ապա արտաքին վարկերի գծով կիրականացվի 171.8 մլրդ դրամի ֆինանսավորում։ Միևնույն ժամանակ, 110.9 մլրդ դրամ էլ նախատեսվում է հատկացնել արտաքին վարկերի մայր գումարի մարմանը։ Եվս 46.5 մլրդ դրամ էլ արտարժութային պարտատոմսերի մարմանն է հատկացվելու։

Այսպիսով ստացվում է, որ ներքին ու արտաքին աղբյուրներից եկող տարի Հայաստանը 440 մլրդ դրամի պարտք է ներգրավում, միևնույն ժամանակ՝ պարտքի մարումների գծով 280.7 մլրդ դրամ է հատկացնելու։ Ինչի արդյունքում էլ ստացվում է, որ պետական բյուջեի պակասուրդի զուտ ֆինանսավորումը փոխառու միջոցների հաշվին կկազմի 159.3 մլրդ դրամ։

Բացի մայր գումարները, պետությունը ևս 168 մլրդ դրամ էլ ուղղվելու է տոկոսավճարներին։ Ինչպես ավելի վաղ գրել ենք, տոկոսավճարների գումարը ներառվում է բյուջեի ծախսերի մեջ։

Բյուջեի հիմքում դրված կանխատեսումների համաձայն` 2020 թվականի տարեվերջի դրությամբ Կառավարության պարտքը կկազմի 3 տրլն 419 մլրդ դրամ (7 մլրդ 177 մլն ԱՄՆ դոլար) և 2019 թվականի տարեվերջի համեմատությամբ կաճի 162 մլրդ դրամով (341 մլն ԱՄՆ դոլարով):

Կանխատեսվում է, որ Կառավարության պարտքը նախորդ տարիների համեմատ կաճի ավելի դանդաղ տեմպով, որի արդյունքում ՀՆԱ-ի նկատմամբ պարտքի ցուցանիշը կնվազի 1.4 տոկոսային կետով և կկազմի 48.2 %:

Ըստ Ֆինանսների նախարարության

Ինչպես երևում է գծապատկերում, Կառավարության պարտքը ՀՆԱ-ի նկատմամբ ամենացածրը կլինի վերջին հինգ տարիներին։ Այն դեռևս բարձր է 2015 թվականի ցուցանիշից։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter