Կառավարությունն այսօրվա նիստին որոշեց 26 միլիոն դրամ հատկացնել Հարկադիր կատարումն ապահովող ծառայության շենքի պահպանությունն ապահովելու նպատակով։ Գումարը տրամադրվելու է ոստիկանությանը։

Այս որոշմամբ նաև ծառայության շենքը ներառվեց ոստիկանության կողմից պահպանության ենթակա պետական մարմինների շենքերի ու շինությունների ցանկում։ Արդարադատության նախարարությունը Կառավարությանը հայտնել է, որ ծառայության վարչական շենքի պահպանությունը և անվտանգությունը կարևորելով՝ նպատակահարմար է, որ դրա պահպանությունն իրականացվի ոստիկանության կողմից։

Այս նախագծի մասին «Հետքը» գրել էր դեռևս օրեր առաջ։ Այն հունվարի 10-ին Արդարադատության նախարարությունը ներկայացրել էր իրավական ակտերի նախագծերի միասնական կայքում և մինչ հունվարի 25-ը նախատեսված էր դրա հանրային քննարկումը։

Ստացվում է՝ մինչ քննարկման նախատեսված ժամկետի ավարտը, գործադիրն արդեն ընդունեց ԴԱՀԿ շենքը պետական պահպանության ենթակա շենքերի ցանկում ներառելու որոշումը։