Խորհրդարանը մերժեց «Լուսավոր Հայաստան» խմբակցության ներկայացրած «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքի գործողության ժամկետը երկարաձգելու նախագիծն օրակարգ ներառելու հարցը:

Տեղեկացնենք, որ գործող իրավակարգավորմամբ` զորակոչից խուսափած անձինք այլևս չեն կարող վերադառնալ Հայաստան, վճարել պետական տուրքը և ազատվել քրեական պատասխանատվությունից: Օրենքի գործողության ժամկետն ավարտվել է դեկտեմբերի 31-ին, հետևաբար հունվարի մեկից զորակոչից խուսափած ցանկացած քաղաքացի, երբ վերադառնա Հայաստան, ենթարկվելու է քրեական պատասխանատվության:

Նախագծի հեղինակ «Լուսավոր Հայաստան» խմբակցության քարտուղար Գևորգ Գորգիսյանի խոսքով` օրենքի գործողության ժամկետի երկարաձգմամբ հնարավորություն են ընձեռում այն քաղաքացիներին, ովքեր զինապարտ չեն, վերադառնալ հայրենիք, տուգանք վճարել ու ազատվել քրեական պատասխանատվությունից:

«Երբ նախորդ տարի գարնանը ընդունում էինք այս նախագծում փոփոխություն կատարելու հարցը, հանձնաժողովում քննարկումների ընթացքում Կառավարության ներկայացուցիչները և մեծամասնության պատգամավորները խոստացան մինչ օրենքի ժամկետի լրանալը տալ հիմնարար լուծում, բայց մինչ տարվա ավարտ որևէ լուծում չկար: Կար քննարկվող տարբերակ, որը դրվեց շրջանառության մեջ, ապա հանվեց, մենք առաջարկում ենք օրենքի գործողության ժամկետը երկարաձգել, որ հնարավորություն տրվի 2020-ի ընթացքում մեր հայրենակիցները վերադառնան Հայաստան»,- ասաց Գորգիսյանը:

Պատգամավորի խոսքով` քանի դեռ չկա օրենքի նոր նախագիծ, ապա ցանկացած հետախուզման մեջ գտնվող անձ (զորակոչից խուսափելու հոդվածով), հենց վերադառնա Հայաստան, ենթարկվելու է քրեական պատասխանատվության:

«Քանի դեռ չկան նոր խաղի կանոններ, առաջարկում ենք նույն օրենքը գործի մինչև մշակվի նոր նախագիծ»,- ասաց նա:

Պաշտպանության և անվտանգության հարցերի մշտական հանձնաժողովի տեսակետը ներկայացրեց «Իմ քայլը» խմբակցության պատգամավոր Տիգրան Կարապետյանը: Վերջինիս խոսքով` այս նախագիծը դարձել է բանակից խուսափելու օրենք:

Պատգամավորը հիշեցրեց, որ նախորդ փոփոխության ժամանակ համաձայնության էին եկել, որ վերջին անգամ է օրենքի գործողության ժամկետը երկարացվում: Կարապետյանը կոչ արեց դեմ քվեարկել նախագծին: Գևորգ Գորգիսյանը հակադարձեց` նախագիծը միտված չէ բանակից խուսափելը խրախուսելուն, միտված է ներգաղթին:

Նախագիծը մերժվեց օրակարգ ընդգրկվել 38 կողմ,  79 դեմ ձայների հարաբերակցությամբ:

Գևորգ Գորգիսյանը հիշեցրեց նաև, որ երեկ ազգային հերոս Մովսես Գորգիսյանի մահվան տարելիցն էր, որը մեծ ներդրում է ունեցել բանակաշինության գործում և շնորհակալություն հայտնեց այն պետական ու քաղաքական գործիչներին, որոնք հարգանքի տուրք են մատուցել վերջինիս հիշատակին:

Տեղեկացնենք, որ վարչապետի և խորհրդարանի պաշտոնական կայքերում և ֆեյսբուքյան էջերում չկա որևէ անդրադարձ Հայաստանի ազգային հերոս Մովսես Գորգիսյանի մահվան 30-րդ տարելիցի առնչությամբ:

Լուսանկարը` Անի Սարգսյանի