Վերաքննիչ քրեական դատարանում՝ նախագահությամբ դատավոր Մնացական Հարությունյանի, քիչ առաջ սկսվել է «5-րդ ալիքի» սեփականատեր Արմեն Թավադյանի խափանման միջոցը կալանավորումն ընտրելու որոշման դեմ նրա պաշտպանների բողոքի քննությունը:

Նիստին զուգահեռ դատարանի բակում բողոքի ակցիա է տեղի ունենում, որին մասնակցում են ՀՀԿ-ի ներկայացուցիչներ Արմեն Աշոտյանը, Էդուարդ Շարմազանովը, քիչ առաջ դատարան եկավ նաև Հայաստանի երկրորդ նախագահ Ռոբերտ Քոչարյանի որդին՝ Լևոն Քոչարյանը:

Արմեն Աշոտյանը լրագրողների հետ զրույցում ասաց, որ եկել է աջակցելու Հայաստանում մամուլի ազատությանը, քանի որ վերջին զարգացումները ցույց են տալիս, որ Հայաստանի իշխանությունները նոր գրոհ են սկսել խոսքի ազատության դեմ:

Արմեն Աշոտյան

«Այսօր Արմեն Թավադյանն իր վրա է կրում այդ ռիժիմի ռեպրեսիվ ապարատի ամբողջ ծանրությունը»,- ասաց Աշոտյանը՝ Թավադյանի վերաբերյալ գործը շինծու որակելով: Աշոտյանի համար առավել մտահոգիչ է, որ այս գործի շրջանակներում Արմեն Թավադյանն արդեն 28 օր զրկված է ազատությունից: Վերջինս հայտարարեց, որ ոչ ոք լրատվամիջոցների նկատմամբ անպատիժ ճնշումներ գործադրել, իրենց լռեցնել չի կարող:

Էդուարդ Շարմազանովը լրագրողների հետ զրույցում ասաց, որ ինքը դատարանի բակում է՝ ընդդեմ բռնատիրության և հանուն ժողովրդավարության ու խոսքի ազատության:

Էդուարդ Շարմազանով

Լևոն Քոչարյանը նշեց, որ հարցեր է առաջացնում հանգամանքը, որ քրեական գործով մեկ այլ անձ, ում վերաբերյալ տեսանյութ է հրապարակվել, ազատության մեջ է, իսկ Թավադյանը՝ կալանքի տակ: Նշենք, որ այս պահին նիստը շարունակվում է: Թավադյանը բերվել է դատարան ու մասնակցում է նիստին:

Լևոն Քոչարյան

Հիշեցնենք, որ Արմեն Թավադյանը ձերբակալվել է 2019-ի դեկտեմբերի 24-ին, ապա նրան մեղադրանք է առաջադրվել կազմակերպված խմբի կողմից վկային կամ տուժողին սուտ ցուցմունք տալու նպատակով կաշառելու հոդվածով, և միջնորդություն է ներկայացվել դատարան՝ նրա նկատմամբ կալանքը որպես խափանման միջոց ընտրելու վերաբերյալ:

Քրեական գործով, որի շրջանակներում Թավադյանը կալանավորվեց, մեղադրյալ է նաև  Ռոբերտ Քոչարյանի աջակից Վարուժան Մկրտչյանը, որն, ըստ ոստիկանության տեսանյութի, Մարտի 1-ի գործով տուժողներից մեկին գումարի և հետագայում պաշտոնի դիմաց ցուցմունքից հրաժարվելու առաջարկ էր արել:

Մկրտչյանի նկատմամբ որպես խափանման միջոց է ընտրվել չհեռանալու մասին ստորագրությունը: