Խորհրդարանն առաջին ընթերցմամբ ընդունեց «Իմ քայլը» խմբակցության պատգամավոր Գևորգ Պապոյանի հեղինակած Վարչական իրավախախտումների վերաբերյալ օրենսգրքում լրացումներ ու փոփոխություններ կատարելու օրենսդրական առաջարկը, որի համաձայն՝ ավտոմեքենայի մեկ պետհամարանիշի բացակայության դեպքում նոր` ավելի մեղմ կարգավորումներ կլինեն:

Առաջարկվում է այն դեպքերում, երբ մեքենայի համարանիշերից մեկն է բացակայում, կիրառել 20 հազար դրամ տուգանք և երկու բալ որպես պատժամիջոց: Մինչ քվեարկությունը «Բարգավաճ Հայաստան» խմբակցության քարտուղար Արման Աբովյանը հայտարարեց, որ դեմ են քվեարկելու նախագծին, իսկ մինչ երկրորդ ընթերցումը, առաջարկով հանդես կգան հանել բալը որպես տույժ:

Նախագիծն առաջին ընթերցմամբ ընդունվեց 99 կողմ, 21 դեմ և 1 ձեռնպահ ձայների հարաբերակցությամբ: