Լիանա Թորոսյան. «Կոնորավիրուսի մուտքը Հայաստան չի բացառվում»
«Եթե հետամուտ լինենք առողջապահության համաշխարհային կազմակերպության առաջարկություններին և հայտարարություններին, ապա պետական սահմանի անցման կետերում որևէ սահմանափակող միջոցառում չի առաջարկվում»,- ասում է Հիվանդությունների վերահսկման և կանխարգելման ազգային կենտրոնի հատուկ վտանգավոր և օդակաթիլային վարակների բաժնի պետ Լիանա Թորոսյանը։
Հիշեցնենք, որ երեկ Առողջապահության համաշխարհային կազմակերպությունը (այսուհետ՝ ԱՀԿ) տեղեկացնում էր «նոր կորոնավիրուսի» տարածման մասին, որի սկզբնաղբյուրը Չինաստանի Ուհան քաղաքն է:
Լիանա Թորոսյանի խոսքով՝ կոնորավիրուսի մուտքը Հայաստան չի բացառվում, քանի որ ներկայիս առևտրային կապերը, զբոսաշրջիկների հոսքը կարող է իր հետ Հայաստան բերել հիվանդությունը: ԱՀԿ-ն առաջարկում է պատրաստ լինել, և երկրի ներսում վիրուսը հայտնաբերելու դեպքում արագ արձագանքել ու կանխարգելիչ միջոցառումներ իրականացնել։
«Այն կանխարգելիչ միջոցառումները, որոնք կատարվում են գրիպի դեպքում կիրառելի են նաև այս կորոնավիրուսի պարագայում, ԱՀԿ-ն այսօր տեղեկացրել է նաև, որ կորոնավիրուսը որոշակի դեպքերում կարող է մարդուց մարդ տարածվել սերտ շփման միջոցով։ ԱՀԿ-ն պատրաստվում է արտակարգ իրավիճակների խորհրդի նիստ հրավիրել, որից հետո արդեն ավելի հստակ առաջարկություններ կլինեն, թե ինչ կարելի է անել: Անհանգստանալ և զգոնություն պահել պետք է, քանի որ գործ ունենք վարակիչ հիվանդության հետ, բայց խուճապի մատնվելու կարիք չկա»,- ասում է նա։
Թորոսյանի խոսքով՝ ԱՀԿ-ի հորդորը ամբողջ հանրությանը գրիպի կանխարգելման բոլոր միջոցառումներին հետևելն է, պետք է բացառել շփումը կենդանիների հետ, քանի որ կորոնավիրուսը ավելի ինտենսիվ տարածվում է կենդանուց մարդ, քան մարդուց մարդ։
«Եթե շրջագայության մեկնած մարդիկ իրենց շրջագայության ընթացքում կամ վերադառնալուց հետո հարբուխին կամ շնչառական հիվանդություններին բնորոշ որևէ ախտանիշ են նկատում պետք է դիմեն բժշկական օգնության և տեղեկացնեն բժշկին, թե ո՞ր երկիր են գնացել ու որ օրերին»,- ասում է Լիանա Թորոսյանը։
Նրա խոսքով՝ պետական սահմանի անցման կետերի հսկողությունը նախարարության լիազորություններից դուրս է, բացի այդ ԱՀԿ-ն չի առաջարկում օդային հսկողություն իրականացնել, քանի որ դա չարդարացված միջոցառում է։
Լուսանկարը՝ «Արմենպրեսի»
Մեկնաբանել