Վերաքննիչ քրեական դատարանը՝ նախագահությամբ դատավոր Մնացական Հարությունյանի, քիչ առաջ հեռացավ խորհրդակցական սենյակ՝ ցմահ դատապարտյալ Աշոտ Մանուկյանին պայմանական վաղաժամկետ ազատ արձակելու հարցով որոշում կայացնելու: Որոշումը կհրապարակվի վաղը՝ հունվարի 24-ին:

Աշոտ Մանուկյանն անազատության մեջ է 1996 թվականից: Մեղադրվել և դատապարտվել է երեք զինծառայողի սպանության համար: Արդարադատության նախարարության պրոբացիոն ծառայությունը նրա ազատ արձակման վերաբերյալ դրական, իսկ Քրեակատարողական ծառայությունը՝ բացասական եզրակացություն են տվել:

Չնայած տարբերվող եզրակացություններին՝ այս երկու կառույցներն էլ Աշոտ Մանուկյանին բնութագրել են դրական: Նրան ներել են նաև տուժողների ծնողները, սակայն նման փաստերի առկայության պայմաններում առաջին ատյանի դատարանը գտել է, որ Աշոտ Մանուկյանը պետք է մնա անազատության մեջ։ Այս դատական ակտի դեմ նրա պաշտպանները վերաքննիչ բողոք են ներկայացրել։