«Լուսավոր Հայաստան» խմբակցության պատգամավորներ Անի Սամսոնյանն ու Աննա Կոստանյանը դադարեցնում են ԱԺ ատելության դեմ պայքարի աշխատանքային խմբում իրենց մասնակցությունը:

Այս մասին ԱԺ հայտարարությունների ժամին ասաց «Լուսավոր Հայաստան» խմբակցության պատգամավոր Անի Սամսոնյանը:

Պատգամավորի խոսքով` սահմանադրական փոփոխոխությունների նախագծի շուրջ քննարկումների ժամանակ «Իմ քայլը» խմբակցության անդամներն իրենց ելույթներում ցուցաբերել են անհանդուրժողականություն բազմակարծության և տարբերվող գաղափարական մոտեցումների նկատմամբ: Սամսոնյանի համոզմամբ` վարչապետ Նիկոլ Փաշինյանի եզրափակիչ ելույթն էլ միտված էր հանրությանը սևերի ու սպիտակների, յուրայինների և ոչ յուրայինների բաժանելուն, ապա վարչապետի կողմից պառլամենտական մաստեր կլասի որակումը իր թիմին դրական տրամադրվածությունն է ամրապնդել ատելության մթնոլորտի նկատմամբ:

«Իշխանությունը նպաստում է ատելության խոսքի կատարելագործմանը, չունի կամք ատելության դեմ պայքարելու, սիրո և համերաշխության օրակարգը կյանքի կոչելու համար:  Համարելով ատելության դեմ պայքարում են իրական օրակարգով` ես և Աննա Կոստանյանը դադարեցնում ենք մեր մասնակցությունը ատելության դեմ պայքարի նպատակով ԱԺ աշխատանքին խմբի աշխատանքներին: Այսպիսով, հայտնում ենք մեր անվստահությունը, քանի որ ատելության դեմ ձևական պայքարում անելիք չունենք»,- ասաց Սամսոնյանը:

Ատելության դեմ պայքարի աշխատանքային խումբը ձևավորվել է տարեվերջին` «Իմ քայլը» խմբակցության պատգամավոր Սարգիս Խանդանյանի առաջարկով: Աշխատանքային խմբում «Լուսավոր Հայաստան»-ի անդամները երկուսն էին` Սամսոնյանն ու Կոստանյանը: