Վերաքննիչ վարչական դատարանի դատավոր Արթուր Պողոսյանը «Դատական օրենսգիրք» սահմանադրական օրենքի փոփոխությունների թեմայով խորհրդարանական լսումներին անդրադարձավ դատավորների թեկնածուների տարիքային շեմի իջեցման առաջարկին: Հիշեցնենք, որ փոփոխություններով առաջարկվում է ամրագրել, որ դատավորի թեկնածուի հավակնորդը կարող է լինել 25 տարեկան` գործող 28-ի փոխարեն:

«Մենք, ըստ էության, նախագծով ցանկանում ենք դատավորների թեկնածուների տարիքային ցենզը իջեցնել` ասելով, որ երիտասարդ, խոստումնալից անձինք կարող են դատավորի պաշտոն զբաղեցնել: Հասկանալի մոտեցում է, բայց ուզում եմ շեշտադրել մի հանգամանք` կրթական մասը մի կողմ, բայց դատավորը պետք է ունենա նաև որոշակի փորձ` և՛ կյանքի, և՛ աշխատանքային, և՛ իրավահարաբերությունների գնահատման իմաստով, միայն տեսական գիտելիքները, կրթական աստիճան ունենալը բավարար չեն, իմ համոզմամբ, որ անձը կարողանա հավակնել դատավորի պաշտոնին»,- ասաց Արթուր Պողոսյանը:

Արդարադատության նախարար Ռուստամ Բադասյանն արձագանքեց` կյանքի փորձը շատ հարաբերական է:

«Հնարավոր է` մարդ 35-40 տարեկանում այդպես էլ կյանքի փորձ չունենա, և չեմ կարծում  25 թե 28 տարեկան՝ դրանց միջև սկզբունքային շատ մեծ տարբերություն կա, կարծում եմ ապագայում տարիքային ցենզ չպետք է լինի: Դատավորներ պետք է դառնան մարդիկ 35-40 տարեկան դառնալուց հետո, Ձեր մատնանշած փորձն ունենալուց հետո, բայց չպետք է մոռանանք՝ ինչ իրավիճակում ենք: Նաև պետք է հաշվի առնել ավելի ավագ և երիտասարդ տարիքով անձանց կրթությունը, արդյոք ավելի ավագ սերնդի բազային կրթությունը համապատասխանում է ներկա պահանջներին, ինչպես՝ օտար լեզուների իմացությունը»,-ասաց Բադասյանը:

Դատավոր Պողոսյանն անդրադարձավ նաև այն հարցին, որ Բարձագույն դատական խորհրդի կայացրած որոշումները բողոքարկելու հնարավորություն կա, սակայն բողոքարկման հարցով կրկին ԲԴԽ պետք է դիմել:

«Արդյոք ճի՞շտ է որ մարմինը, որը ժամանակին որոշում է կայացրել, վերանայի իր որոշումը»,- հարցրեց նա:

Բադասյանն արձագանքեց, որ ուսումնասիրել են Վճռաբեկ դատարանի սահմանադրաիրավական կարգավիճակը և եկել այն եզրակացության, որ այն չի կարող հանդես գալ որպես վերաքննության ատյան ԲԴԽ-ի համար: Ուստի առաջարկվում է, որ ԲԴԽ-ն կարող է վերանայել իր որոշումը նոր երևան եկած հանգամանքների դեպքում: