Չինաստանում կորոնավիրուսի համաճարակի գագաթնակետն այլևս անցյալում է․ Առողջապահության համաշխարհային կազմակերպություն
Չնայած Եվրոպայում կորոնավիրուսով վարակվածների մեծ թվին, իրավիճակը չի կարելի անվանել գլոբալ պանդեմիա, հայտարարել է Առողջապահության համաշխարհային կազմակերպությունը։ Խոսքը գնում է «առանձին երկրներում առկա համաճարակի» վերաբերյալ։
Չինաստանում կորոնավիրուսի համաճարակի գագաթնակետն այլևս անցյալում է։ Այդ մասին փետրվարի 24-ին հայտարարել է Առողջապահության համաշխարհային կազմակերպության գլխավոր տնօրեն Տեդրոս Ադանոմ Հեբրեիսուսը: ԱՀԿ փորձագետների տվյալներով, որոնք եղել են վիրուսի տարածման օջախում, համաճարակի տարածման գագաթնակետը եղել է հունվարի վերջին։
«Իտալիայից, Իրանից և Հարավային Կորեայից ստացվող թվերը խիստ անհանգստացնող են, սակայն հիմա խոսքը գնում է առանձին երկրներում առկա համաճարակի վերաբերյալ։ Պանդեմիա անվանում են ամբողջ երկրագնդով նոր վիրուսի տարածումը: Ներկայումս COVID-19 կորոնավիրուսի տարածումը չի կարելի անվանել պանդեմիա»,- հավելել է ԱՀԿ գլխավոր տնօրենը։
Տեղի ունեցած մամլո ասուլիսի ժամանակ ԱՀԿ-ն ներկայացրել է կորոնավիրուսի վերաբերյալ մի շարք փաստեր։ Այսպես, ներկայումս վիրուսի արդյունքում մահացության ցուցանիշը կազմում է 0,7 %: Թեթև ախտանշաններ ունեցող պացիենտները ապաքինվում են երկու շաբաթում, իսկ ծանր ախտանիշներ ունեցողները՝ 3-7 շաբաթում։ Ավելի վաղ, Գերմանիայի առողջապահության նախարար Յենս Շպանը ազդարարել էր, որ «կորոնավիրուսի համաճարակը հասել է Եվրոպա»։ Հայտարարությունն արվել էր Իտալիայում COVID-19 կորոնավիրուսի համաճարակի տարածման ֆոնին։
Փետրվարի 25-ի դրությամբ կորոնավիրուսից մահացածների թիվը հասել է 2710-ի, վարակակիրների թիվը՝ 80 419-ի, իսկ ապաքինվածների թիվը՝ 27 909-ի։
նյութի աղբյուրը՝ dw.com
լուսանկարը՝ www.cfr.org
Մեկնաբանել