SARS-CoV-2 կորոնավիրուսի արագ տարածման և դրա արդյունքում COVID-19 վարակային թոքաբորբի առաջացման ֆոնին՝ Հարավային Կորեայի իշխանությունները ազդարարել են համաճարակաբանական վտանգի բարձրագույն մակարդակ։ Այդ մասին գրում է «Deutsche welle»-ն՝  հղում կատարելով կորեական աղբյուրներին։ Մարտի 1-ին Կորեայի նախագահ Մուն Չժե Ինը հայտարարել է, որ երկրի կառավարությունը կնախաձեռնի բոլոր անհրաժեշտ միջոցները վիրուսի տարածումը կրճատելու նպատակով։

«Մենք կհաղթահարենք COVID-19 վարակային թոքաբորբի բռնկումը և նորից կկենդանացնենք մեր կրճատվող տնտեսությունը»,- հավելել է Հարավային Կորեայի նախագահը։

Միայն կիրակի առավոտյան կորեական իշխանությունները հայտնել են Սեուլում կորոնավիրուսի 586 նոր դեպքերի մասին։ Ընդհանուր առմամբ, Հարավային Կորեայում վարակակիրների թիվը գերազանցել է 3700-ը։ Վերջին տվյալներով, կորոնավիրուսի արդյունքում Հարավային Կորեայում մահացել է 18 մարդ։ Երկիրը, Չինաստանի հետո, համարվում է կորոնավիրուսի տարածման գլխավոր օջախը։

Վիճակագրությունը ցույց է տալիս, որ զուգահեռ Չինաստանում էականորեն կրճատվում է կորոնավիրուսով վարակվածների թիվը։ Չինաստանի առողջապահության պետական կոմիտեն իր հերթին հայտարարել է 573 նոր պացիենտների մասին, որոնցից 570-ը միայն Հուբեյ նահանգում։ Իսկ արդեն վերջին երկու ամիսներին Չինաստանում վարակակիրների թիվը հասել է 80 000-ի, որոնցից 67 000-ը միայն Հուբեյ նահանգում։ Այդուհանդերձ, վերջին մի քանի օրերին նոր վարակակիրների թիվը կտրուկ անկում է ապրում, եթե դա համեմատենք հունվարի և փետրվարի առաջին կեսի թվերի հետ։

Կորոնավիրուսի վարակակիր ունեցող երկրների թիվը հասել է 64-ի։ Չինաստանից և Հարավային Կորեայից հետո, վիրուսակիրների թվով, երրորդ տեղում գտնվում է Իտալիան, որտեղ գրանցվել է շուրջ 1100 կորոնավիրուսով հիվանդ պացիենտ։ Իրանում գրանցվել է 978 դեպք, Ճապոնիայում՝ 241, Գերմանիայում՝ 117, Սինգապուրում՝ 102, Ֆրանսիայում՝ 100, Հոնկոնգում՝ 95, ԱՄՆ-ում՝ 69 և այլն։

Մարտի 1-ին վարչապետ Նիկոլ Փաշինյանը ֆեյսբուքյան իր էջում հայտարարել էր, որ Հայաստանում գրանցվել է կորոնավիրուսով հիվանդ պացիենտի առաջին դեպքը։ Պացիենտը ՀՀ 29 տարեկան քաղաքացի է։ Նա օդանավով Երեւան է ժամանել փետրվարի 28-ին Թեհրանից։ Նախնական թեսթը դրական արդյունք է տվել, կրկնակի թեսթի արդյունքները հայտնի են դարձել Երեւանի ժամանակով գիշերը ժամը երեքին։ Պացիենտի կնոջ թեսթի պատասխանը բացասական է եղել։ 32 քաղաքացիներ էլ գտնվում են կարանտինի մեջ։ Նրանք մեկուսացվել են Ծաղկաձորի «Գոլդեն Փելես» հյուրանոցում։

Լուսանկար՝ «Reuters» գործակալության