Շրջակա միջավայրի նախարար Էրիկ Գրիգորյանը պետական պաշտոն զբաղեցնելիս երբևէ ծրարով գումար չի ստացել:

Այս մասին ԱԺ-Կառավարություն հարցուպատասխանին ասաց նախարար Գրիգորյանը` արձագանքելով «Լուսավոր Հայաստան» խմբակցության պատգամավոր Հրանտ Այվազյանի հարցադրմանը: Պատգամավորը հիշեցրել էր, որ Էրիկ Գրիգորյանը նախկինում ևս պետական պաշտոն է զբաղեցրել, արդյոք ծրարով գումա՞ր ստացել է, թե՝ ոչ:

«Ծրարով գումար երբևէ չեմ ստացել: Երբ աշխատել եմ նախարարությունում, մինչև 2011 թվականն եմ աշխատել, ունեմ 2010 թվականի հայտարարագիր, որտեղ նշված էր այն գումարները, որ ունեի: 2017-ին վերադարձա պետական համակարգ, կրկին ունեմ հայտարարագիր, որտեղ նշված է ինչքան գումար ունեմ»,- ասաց Էրիկ Գրիգորյանը` հավելելով, որ միջազգային կառույցներում աշխատելիս ծրարով գումար ստացել է:

Նախարարը նաև տեղեկացրեց, որ պետական համակարգ վերադառնալուց հետո իր աշխատավարձը մոտ տասն անգամ նվազել է:

«Ես ստանում էի մոտ հինգ միլիոն դրամ, հետո երևի 340 հազար դրամ»,- ասաց նա:

• Նիկոլ Փաշինյան. «Ես նախարարներին հարցաքննելու սովորություն չունեմ, ցանկություն էլ չունեմ»