Կառավարության այսօրվա նիստի մեկնարկին վարչապետ Փաշինյանը կրկին հետաքրքրվեց կորոնավիրուսի կանխարգելմանն ուղղված աշխատանքներով:

Առողջապահության նախարարը հայտնեց, որ բոլոր միջոցառումները շարունակում են իրականացնել՝ սկսած սահմանային հսկողությունից մինչև այն պացիենտների հսկողություն, որոնք հնարավոր է, որ ունենան ախտանիշներ:

«Ունենք մեկ հաստատված դեպք, որ գտնվում է ինֆեկցիոն հիվանդանոցում և 31 քաղաքացիներ, որոնք մեկուսացված են և հիմա ապրում են Ծաղկաձորում: Բոլորի ինքնազգացողությունը լավ է, որևէ գանգատ չունեն»,- նշեց Ա. Թորոսյանը:

Նախարարի խոսքով՝ երեկ հետազոտել են նաև կորոնավիրուսով հիվանդ քաղաքացու կնոջը, որի մոտ կրկին հերքվել է հիվանդության առկայությունը:

Հունվարի վերջից մինչ օրս կատարվել է 162 նմուշ, որոնցից միայն մեկն է դրական եղել:

«Գոլդեն Փելես»-ում գտնվող քաղաքացիները, նախարարի խոսքով, ապահովված են ամեն ինչով, ունեն գրքեր, ինտերնետ, հեռուստատեսություն: Քաղաքացիներն այնտեղ կմնան մինչև մարտի 14-ը:

Վարչապետը հետաքրքրվեց նաև աշխարհում տիրող իրավիճակի մասին:

Արսեն Թորոսյանը նշեց, որ Չինաստանը, լինելով հիվանդության աղբյուրը, ամենաառաջինն էր սկսել միջոցառումները, նոր դեպքերի և նոր մահերի գրանցման կտրուկ անկում է ապրել, և այն նահանգը, որտեղ սահմանափակման միջոցառումներ են իրականացվել, աստիճանաբար վերադառնում է իր բնականոն կյանքին: Իրավիճակը մի քիչ բարդանում է Հարավային Կորեայում, Իրանում, ինչպես նաև՝ Իտալիայում, և արդեն մի քանի հարյուր դեպք է արձանագրվել Գերմանիայում, Ֆրանսիայում և Իսպանիայում:

«Հայաստանում նոր դեպքերի դեպքում, իհարկե, կհայտնենք դրա մասին: Ամեն ինչ վերահսկելի է, և հանրապետությունը կարող է իր բնականոն կյանքով ապրել»,- նշեց առղջապահության նախարարը:

Հիվանդության կանխարգելմանն ուղղված քայլերն իրականացվում են նաև Կառավարությունում:

Այստեղ մտնելիս նախևառաջ չափում են լրագրողների ջերմությունը, խնդրում ձեռքերն ախտահանել, և միայն դրանից հետո թողնում ներս:

Լուսանկարում՝ առողջապահության նախարար Արսեն Թորոսյանը Կառավարության փետրվարի 27-ի նիստին