Չինաստանում փլուզվել է կորոնավիրուսի կարանտինային հյուրանոց
Չինաստանի Ցյուանչժոու քաղաքում տեղի ունեցած փլուզման արդյունքում փլատակների տակ է հայտնվել շուրջ 70 մարդ։ Հինգհարկանի «Xinjia Express Hotel» հյուրանոցն օգտագործվում էր կորոնավիրուսի պատճառով կարանտինում գտնվող անձանց մեկուսացման համար։ Այդ մասին հայտնում է «BBC»-ն։ Վերջին տվյալներով փլատակների տակից հանվել է 38 մարդ։
Դեռևս պարզ չէ, թե որն է եղել հյուրանոցի փլուզման պատճառը։ Փլուզումը տեղի է ունեցել տեղի ժամանակով 19։30-ին (Երևանի ժամանակով 15։30-ին)։ Անհայտ է նաև զոհերի առկայության փաստը։ Փրկարարական աշխատանքներին մասնակցում են շուրջ 150 փրկարարներ։ Աշխատանքներին ներգրավված են 36 միավոր հատուկ տեխնիկա, շտապ օգնության 15 մեքենաներ, 67 հրշեջ մեքենաներ։ Տեսագրությունից պարզ է դառնում, որ փլուզվել են հյուրանոցի տանիքի մի քանի հենածածկեր։
#BREAKING: A hotel building collapsed in Quanzhou, SE China's Fujian at around 7 pm Saturday, trapping an unknown number of people under it. So far 16 people have been rescued. Rescue work remains underway. pic.twitter.com/rK7tEagQvV
— People's Daily, China (@PDChina) March 7, 2020
Հյուրանոցը կառուցվել էր 2018 թվականին և ուներ շուրջ 80 համարներ։ «Beijing News» պարբերականը մեջբերում է մի կնոջ խոսքեր, որի բարեկամները գտնվում էին հյուրանոցում։
«Ես չեմ կարողանում կապ հաստատել նրանց հետ, նրանք չեն պատասխանում իմ զանգերին։ Ես նույնպես կարանտինի մեջ եմ (մեկ այլ հյուրանոցում) և շատ եմ անհանգստանում։ Ես չգիտեմ՝ ինչ անել։ Նրանք առողջ էին, ամեն օր չափում էին նրանց ջերմությունը, և թեստերը ցույց էին տալիս, որ ամեն բան կարգին է»։
Հյուրանոցի փրկված աշխատակիցներից մեկը, որը «Beijing Youth Daily»-ին չի ցանկացել հայտնել իր անունը, ասել է, որ հյուրանոցի սեփականատերը ցանկանում էր վերանորոգել հյուրանոցի ներքին պատերը։ Այն մասին, որ շինարարական աշխատանքները կարող էին սկսված լինել, որևէ մեկը տեղյակ չէր։
Video: 34 people have been pulled out from the debris of the hotel used to quarantine close contacts of patients infected with #coronavirus https://t.co/AAPizyM1Q2 pic.twitter.com/Vohls1PVLZ
— CGTN (@CGTNOfficial) March 7, 2020
Փլուզումը հանրային մեծ արձագանք է առաջացրել Չինաստանում։ Փրկարարական աշխատանքներին «Sina Weibo» սոցիալական կայքի միջոցով ուղիղ եթերում հետևել է շուրջ երկու միլիոն մարդ։
Ուրբաթ օրվա տվյալներով՝ Ֆուցզյան նահանգում, ընդհանուր առմամբ, գրանցվել է կորոնավիրուսով վարակման 296 դեպք, իսկ շուրջ 11 000 մարդ անմիջական հսկողության տակ են, քանի որ շփվել են վարակակիրների հետ։
Վերջին տվյալներով՝ կորոնավիրուսի վարակակիրների թիվը հասել է 105 602-ի, մահացածների թիվը՝ 3532-ի, իսկ ապաքինվածների թիվը՝ 58 625-ի։
Լուսանկարը՝ AFP/STR-ի
Մեկնաբանել