Նիկոլ Փաշինյան. «Եթե բոլորին մեկուսացնեինք, մեզ պետք կլիներ 10 հատ «Գոլդեն Փելես» հյուրանոց»
ԱԺ հատուկ նիստին վարչապետ Նիկոլ Փաշինյանն անդրադարձավ այն հարցին, թե ինչու ռիսկային գոտում գտնվող երկրներից ՀՀ քաղաքացիների` Հայաստան գալուց հետո նրանց չեն մեկուսացրել:
«Ամսի 20-ին գիտեինք, որ հարևան Իրանում համաճարակ է բռնկվել, և արագ միջոցներ ձեռնարկեցինք և չվերթը սահմանափակեցինք: Փետրվարի 20-ից մինչև մարտի 15-ը Իրանից ՀՀ է ժամանել ՀՀ 3509 քաղաքացի, որոնք անցել են ստուգում: Եթե բոլորին մեկուսացնեինք, մեզ դրա համար պետք կլիներ 10 հատ «Գոլդեն Փելես» հյուրանոց, ընդ որում՝ այդ 3509 քաղաքացիներից երեքի մոտ է հաստատվել, որ վարակվել են: Այսինքն՝ 3509 քաղաքացու 14 օր տանում ենք, փակում ենք և սպառում ենք մեկուսացման ռեսուրսը»,-ասաց Փաշինյանը:
Այնուհետև, վարչապետի խոսքով, Իտալիայից Հայաստան են ժամանել Հայաստանի 813 քաղաքացիներ, ապա ևս 1000-ը` Ֆրանսիայից:
«Հիմա պատկերացրեք 3509 քաղաքացու մեկուսացնում ենք, ասում են` բացատրեք՝ ինչու եք մեզ մեկուսացրել, մենք երեք հոգու կարողանում ենք ասել` տեսեք, ձեզ մոտ կորոնավիրուս է, էն 3506-ին չենք կարողանում բացատրել: Իրենք էլ ասում են` պայմանագրային պարտավորություններ ունեինք, չենք կատարել, էսքան վնաս ենք կրել, մեր բոլոր ծախսերը փոխհատուցենք»,-ասաց նա:
Մյուս քննադատությունը կապված էր Իտալիա-Հայաստան չվերթները չչեղարկելու որոշման հետ: Վարչապետի խոսքով` չլիներ Իտալիա-Երևան չվերթը, միևնույն է, Հայաստանի քաղաքացիները կվերադառնային, օրինակ, Ֆրանսիա-Երևան չվերթով, և հնարավոր է կրկին վարակակիրներ լինեին:
«Եթե ամսի 29-ին փակած լինեինք, երբ սիրելի հայրենակիցը եկել է, Միլանով թռչելու փոխարեն կթռներ Վիեննայով, էլի նույն ջերմաչափումը կաներ, կգնար տուն, դուռը կփակեր ու ոչ մեկիս տուն չէր թողնի»,-եզրափակեց Փաշինյանը:
Մեկնաբանել