Արտակարգ ռեժիմի խախտում է նաև կորոնավիրուսի վերաբերյալ պաշտոնական տեղեկատվությունից տարբերվող գրառումը
Արտակարգ ռեժիմ հաստատելուց հետո զանգվածային լրատվամիջոցների որոշ հրապարակումների վերաբերյալ Կառավարարությունն ահազանգեր է ստացել:
Այս մասին այսօր Կառավարությունում հրավիրված ասուլիսին ասաց արդարադատության փոխնախարար Վահե Դանիելյանը:
Հիշեցնենք, որ արտակարգ դրություն հաստատելուց հետո ԶԼՄ-ների հրապարակումներում ևս որոշակի սահմանափակումներ են սահմանվել:
Փոխնախարարն այսօր հանդիպում է ունեցել ԶԼՄ ներկայացուցիչների հետ և քննարկել առկա սահմանափակումները:
«Թյուրընկալում կա, թե որ տեսակի տեղեկությունները կարող են համարվել արգելված, կարծում եմ քննարկումների արդյունքում նման դեպքերը կնվազեն»,- ասաց փոխնախարարը:
Արգելանքը տարածվում է ինչպես ԶԼՄ-ների, այնպես էլ ֆիզիկական և իրավաբանական անձանց վրա: Ագելվում է վիրուսի տարածման վերաբերյալ պաշտոնական տեղեկությունից տարբերվող տեղեկություն հրապարակել:
Դանիելյանի խոսքով՝ վարակակիրների առողջական վիճակի, շփման շրջանակի և այլ հարցերի մասին տեղեկատվություն չպետք է տրամադրվի ֆիզիկական և իրավաբանական անձանց կողմից, դա կհամարվի արտակարգ ռեժիմի խախտում, իսկ խախտողները կենթարկվեն վարչական պատասխանատվության:
Արտակարգ ռեժիմի պահպանությունը և վերահսկողությունն իրականացնում է ոստիկանությունը: Ոստիկանությունն իրավասու է սոցցանցում արված խուճապ առաջացնող գրառումը ստիպել հեռացնել:
Սահմանափակումներ կան նաև փակ հաստատություններում. արգելվել են զորամասերի, քրեակատարողական հիմնարկներ հանձնուքների փոխանցումը:
Փոխնախարարի խոսքով՝ ռեստորանների, զվարճանքի վայրերի գործունեության սահմանափակում չկա, սակայն ցանկացած օբյեկտի գործունեություն կարող է սահմանափակվել պարետի ցուցումով՝ կախված իրավիճակից:
Մեկնաբանել