Երեկ Դանիայում կայացել է Առողջապահական համաշխարհային կազմակերպության նիստը՝ Եվրոպայի տարածաշրջանային տնօրեն Հանս Պ․ Քլյուգեի գլխավորությամբ, որտեղ քննարկվել են կորոնավիրուսի (COVID-19) կանխարգելման վերաբերյալ հարցեր, ինչպես նաև՝ պատասխանել տարբեր երկրների լրագրողների, այդ թվում՝ «Հետք»-ի հարցերին։

ԱՀԿ տվյալների համաձայն՝ աշխարհի 152 երկրում տարածվել է կորոնավիրուսը և 7000 և ավելի մարդիկ մահացել են։ Վարակի դեպքերի մեկ երրորդն արդեն բաժին է հասնում եվրոպական տարածաշրջանին, որն այսօր դարձել է կորոնավիրուսի պանդեմիայի էպիկենտրոնը։

ԱՀԿ Եվրոպայի տարածաշրջանի տնօրենն իր ելույթը սկսել է կոչ անելով համախմբվել՝ դադարեցնելու կամ գոնե նվազեցնելու կորոնավիրուսի տարածումը։

«Մտածել, որ այն ինձ չի վերաբերում, տարբերակ չէ,- ասել է ԱՀԿ Եվրոպայի տարածաշրջանային տնօրեն Հանս Պ․ Քլյուգեն։- Լավ նորությունն այն է, որ մեր տարածաշրջանը զգոն է և պատրաստ է դիմակայության։ Տարածաշրջանի բոլոր պետությունները տարբեր մակարդակներում արդեն սկսել են  պատրաստվածության, պատրաստակամության և արձագանքման միջոցներ ձեռնարկել։ Մենք շարունակաբար մոնիթորինգ ենք անում այդ միջոցները և պարբերաբար խորհրդատվություններ ենք անցկանցնում առողջապահության նախարարությունների մեր գործընկերների հետ՝ հավաքելու և կիսվելու օգտակար տեղեկություններով»,- ասել է նա։

«Հետք»-ը հարց էր ուղղել ռիսկային գոտում (ամենաշատ վարակակիր ունեցող Էջմիածին քաղաքի տարածքում) ապրող մարդկանց մասին, որքանով է արդյունավետ հատկապես նրանց կորոնավիրուսին բնորոշ գանգատներ ունենալիս թեստավորվում իրականացնելը։

Ինֆեկցիոն հիվանդությունների վերահսկման և կառավարման կենտրոնի գրիպի և այլ  շնչառական վիրուսների բաժնի վարիչ, Անգլիայում հանրային առողջության մասնագետ և ԱՀԿ Եվրոպական տարածաշրջանային գրասենյակի թիմի ղեկավար Ռիչարդ Պեբոդին առաջարկեց պարզապես հնարավորինս հետևել մեկուսացման կանոններին և հիգիենիկ նորմերին՝ պաշտպանելով նաև շրջապատի մարդկանց։

«Ռիսկային գոտում նորից պետք է կիրառել հիմնական կանխարգելիչ միջոցները՝ պաշտպանեք ինքներդ ձեզ և ձեզ շրջապատող մարդկանց՝ նվազեցնելու վարակվելու և վարակը տարածելու վտանգը։ Լվացեք ձեռքերը, պահպանեք շնչառական հիգիենան, հազալու էթիկան, եթե կարող եք մնալ տանը, մնացեք տանը, պահպանեք 2 մ հեռավորությունը՝ նվազեցնելու այլ մարդկանց կողմից վարակվելու վտանգը, ու նորից, հետևեք տեղական ցուցումներին կամ հատուկ խորհուրդներին։ Այս ամենը պետք է որ ձեզ անվտանգ պահի»,- ասաց նա

ԱՀԿ Եվրոպական տարածաշրջանային գրասենյակի թիմի ղեկավար Ռիչարդ Պեբոդի

ԱՀԿ Եվրոպայի տարածաշրջանի տնօրեն Հ․Պ․ Քլյուգեին հաճախակի տրվող հարցերից էր՝ արդյոք եվրոպական պետություններն անում են ամեն ինչ՝ կանխելու պանդեմիան։

Եվրոպայի տարածաշրջանի տնօրենը նշեց, որ դա հասկանալու համար, պետք է հաշվի առնել, որ իրենք գործ ունեն «բռնկման «4 Cs» սցենարների հետ»․ առաջին՝ ոչ մի դեպք, երկրորդ՝ առաջին դեպքը, երրորդ՝ առաջին կլաստերը և չորրորդ՝ համայնքների միջև փոխանցման առաջին ապացույցները։

«Բռնկումը տարբեր երկներում ընթանում է տարբեր արագությամբ՝ պայմանավորված ժողովրդագրական և այլ գործոններով։ Որոշ անդամ երկրներները թվարկված տարբեր սցենարներում են՝ 2 կամ  3, մեծամասնությունը՝ 4-ում։ Հիմնական գորոծողություններն այս սցենարներում նույնն են։ Բայց շեշտը փոխվում է՝ կախված այդ երկրում եղած փոխանցման սցենարից։ Ամեն մի երկիր պետք է գնահատի իր սեփական իրավիճակը և կոնտեքստը, ներառյալ՝ վարակի տարածումը, ձեռնարկված միջոցները և սոցիալական նորմերը և ըստ դրա՝ ձեռնարկի իր համար ավելի համապատախան միջոցներ»,- ասաց Հ․Պ․Քլյուգեն։

Այնուամենայնիվ, նա թվարկեց մի քանի հիմնական սկզբունքներ, որոնցով բոլոր պետությունները պետք է առաջնորդվեն

• Նախապատրաստվել և զգոն լինել 
• Հայտնաբերել, պաշտպանել, բուժել
• Նվազեցնել փոխանցումը
• Զարգացնել և սովորել՝ պաշտպանելով խոցելի մարդկանց

«Սա «կամ-կամ» լուծում չէ: Այն միջոցառումների համընդհանուր փաթեթ է, որը միայն կարող է բերել լավագույն արդյունքների»,- ընդգծել է Հենրի Պ․ Քլյուգեն։

Նա խորհուրդ է տվել մարդկանց ամեն քայլափոխի հիշեցնել, տեղեկացնել և ուղղորդել՝ ինչպես պաշտպանել իրենք իրենց և այլոց, աջակցել համայնքներին և պահպանել հանգստությունն արտակարգ իրավիճակներում։ ԱՀԿ Եվրոպայի տարածաշրջանի տնօերնը նաև ընդգծել է, որ շատ կարևոր է, որ մի շարք  եվրոպական երկրներ հիմա ունեն ազգային ծրագրեր, բազմաոլորտային մոտեցումներ և լաբորատոր բավարար կարողություններ´

«Չինաստանի և այլոց փորձը ցույց է տալիս, որ թետավորումը և շփման հետագծելությունը, սոցիալական հեռավորության պահպանման և հասարակության համախմբման հետ միասին, եթե արագ և արդյունավետ ներդրվեն, կարող են կանխել վարակը և մարդկանց կյանքեր փրկել»։

Նշենք, որ ԱՀԿ Եվրոպայի տարածաշրջանը պարբերաբար հավաքում և 53 անդամ պետություններին է փոխանցում խորհուրդներ, կորոնավիրուսի մասին տարբեր երկրներից մշակված տեղեկություններ, անհրաժեշտության դեպքում նաև՝ ուղարկում է լաբորատոր սարքավորումներ, դեղորայք և այլն։

Բացի այդ, մինչ օրս ԱՀԿ մի քանի փորձագիտական խմբեր են մեկնել տարբեր երկրներ, հատուկ խմբեր մեկնել են Իտալիա՝ Հռոմ և ԱՀԿ Վենետիկյան գրասենյակ։

«Յուրաքանչյուրս այս հասարակության մեջ ունենք մեր դերը՝ չվարակվել, իսկ եթե արդեն վարակված ենք, պաշտպանել ուրիշներին, հատկապես տարեցներին և զուգահեռ այլ հիվանդություններ ունեցող մարդկանց։ Անկանխատեսելի ժամանակներ են, շատ կարևոր է, որ երկներն աշխատեն համախմբված, սովորեն իրարից և խմբավորեն ջանքերը։ Վարակը կարող է հաղթահարվել համայնքների ներսում եղած համերաշխությամբ »,- ասել է Հ․Պ Քլյուգեն։