Ձեռքերը լվանալու արշավին միացել են հոլիվուդյան աստղերը
Արևմտյան աստղերը վերջին օրերին սոցիալական ցանցերում կոչ են անում ավելի հաճախ լվանալ ձեռքերը, ինչը պայմանավորված է կորոնավիրուսի պանդեմիայով։ Այդ ընթացքում աշխարհի տարբեր քաղաքների բնակիչներ փորձում են օգնության հասնել իրենց տարեց հարևաններին՝ մթերք և դեղորայք ձեռքբերելու հարցում։
Ամեն ինչ սկսվեց 10 օր առաջ, երբ հայտնի Գլորիա Գեյնորը «Tik Tok»-ի իր էջում հրապարակեց տեսանյութ, որտեղ նա շուրջ 20 վայրկյան լվանում է ձեռքերը և երգում «I will survive» երգը՝ մի փոքր փոփոխված տարբերակով. «Անհրաժեշտ է ընդամենը 20 վայրկյան՝ փրկվելու համար»։
Այդպես սկսվեց ֆլեշմոբ, որին միացել են արդեն հարյուրավոր մարդիկ.
Ձեռքերը մանրակրկիտ լվանալու կոչ են անում նաև հոլիվուդյան այլ աստղեր, ինչպես օրինակ Հյու Ջեքմանը և Առնոլդ Շվարցնեգերը։
«Փակեք ծորակը, երբ լվանում եք ձեռքերը»,- խորհուրդ է տալիս Ջեքմանը։
«Killers» ռոք խմբի վոկալիստ Բրենդոն Ֆլաուերսը երգել է Mr. Brightside-ի երգը՝ լվանալով ձեռքերը։ Ի տարբերություն Ջեքմանի, նա այդպես էլ չի փակել ծորակը, ինչի համար արժանացել է Թվիթերի օգտատերերի քննադատությանը։
«Լվացեք ձեռքերը, լսեք բժիշկներին, այլ ոչ թե գլխակերներին»,- խորհուրդ է տալիս Կալիֆոռնիայի նախկին նահանգապետ Առնոլդ Շվարցնեգերը։
«Դիրք» հեռուստասերիալի աստղ Բիլի Պորտերն էլ բոլորին կոչ է արել լվանալ ձեռքերը՝ երկու անգամ երգելով «Ծնունդդ շնորհավոր» երգը։
«Սոցիալական հեռավորությունը կարևոր է։ Ձեր փոքրիկ հետույքները պահեք տանը, սիրում եմ բոլորիդ»,- հորդորում է էքսցենտրիկ դերասանը։
Բացի այդ, սոցիալական ցանցերում հայտնվել են ավելի լուրջ նախաձեռնություններ։ Օրինակ, Մանչեսթերի արվարձան համարվող Օլթրինգեմի բնակիչ Ռեյչել Փլեզանթը ներգրավել է կամավորների և շաբաթ օրը Ֆեյսբուքում ստեղծել փոխօգնության խումբ, որին մի քանի օրվա ընթացքում միացել է շուրջ 2000 մարդ։ Վերջիններս օգնել են ծերերին՝ մթերք և դեղորայք ձեռքբերելու նպատակով։
Խմբում անգամ առկա է թղթային դիմումի օրինակ, որտեղ չափահաս մարդը կարող է նշում անել այն կետերի մոտ, որի իրականացմանը ցանկանում է մասնակցել։ «Facebook» սոցիալական ցանցի տվյալներով՝ Մեծ Բրիտանիայում արդեն իսկ առկա է նմանատիպ շուրջ 300 խումբ, որոնց անդամակցում է շուրջ 200 000 մարդ։ Նախորդ շաբաթվա վերջում նմանատիպ խումբ ստեղծվել է նաև Վիեննայում։
«Մենք չենք մտնում ռիսկային խմբի մեջ, այդ պատճառով կարող ենք օգնել ձեզ, եթե դա անհրաժեշտ է։ Եթե պետք է ձեզ համար անել մի բան (գնումներ կատարել կամ օգնել այլ գործերով), մենք ուրախ կլինեինք ձեզ օգնել»,- իրենց շենքի շքամուտքի մոտ գրել են դպրոցականներ Ֆրեդին և Էնդին։ Այդպիսի հայտարարություններ հայտնվել են նաև Մոսկվայում։
Լուսանկարը՝ Գլորիա Գեյնորի «Tik Tok»-ի էջից
Մեկնաբանել