Գերմանիայի կանցլեր Անգելա Մերկելը կանցնի տնային կարանտինի
Գերմանիայի կանցլեր Անգելա Մերկելը որոշել է անցնել տնային կարանտինի այն բանից հետո, երբ պարզ է դարձել, որ մարտի 20-ին կանցլերին հակաթոքաբորբային պատվաստում արած բժշկի մոտ հայտնաբերվել է կորոնավիրուս։ Այդ մասին հայտարարել է Գերմանիայի կառավարության պաշտոնական ներկայացուցիչ Շտեֆեն Զայբերտը։
Զայբերտի խոսքերով՝ որոշումը կայացվել է թեստի պատասխանի ստացումից անմիջապես հետո։ Մերկելը հաջորդող մի քանի օրերի ընթացքում պարբերաբար կհանձնի կորոնավիրուսի ստուգման թեստեր, քանի որ «անմիջապես իրականացվող թեստը չի կարող տալ վերջնական և համոզիչ պատասխան», հայտարարել է Զայբերտը։ Իր ծառայողական պարտականությունները Մերկելը կկատարի իր տնից։
Մինչ կարանտինի մասին հայտարարելը՝ Մերկելը հանդես էր եկել մամուլի ասուլիսով, որտեղ նշել էր, որ երկրամասերի ղեկավարների հետ համաձայնության են եկել այն միջոցառումների և գործողությունների շուրջ, որոնք հնարավորություն կտան Գերմանիայում կանխել կորոնավիրուսի տարածումը։ Բժշկի թեստի պատասխանների մասին Մերկելն իմացել է արդեն մամուլի ասուլիսից հետո։
Մեկնաբանել