Ուկրաինայի իշխանությունները երկրում հաստատել են արտակարգ իրավիճակի ռեժիմ
Ուկրաինայի կառավարությունը որոշել է 30 օրով ողջ երկրում հայտարարել արտակարգ իրավիճակի ռեժիմ։ Պատճառը կորոնավիրուսի տարածումն է։ Այդ մասին տեղեկանում ենք Ուկրաինայի կառավարության ֆեյսբուքյան պաշտոնական էջից։
Երկրում արտակարգ իրավիճակի ռեժիմը կձգվի մինչև ապրիլի 24-ը։ Ուկրաինայի վարչապետ Դենիս Շմիգալը հայտնել է.
«Մենք շարունակում ենք կարանտինը և Ուկրաինայի ողջ տարածքում 30 օրով կմտցնենք արտակարգ իրավիճակի ռեժիմ, որը կձգվի մինչև ապրիլի 24-ը։ Բացի այդ, շեշտում եմ, որ արտակարգ իրավիճակի ռեժիմը տարբերվում է արտակարգ դրության ռեժիմից»։
Արտակարգ իրավիճակի ռեժիմի պարագայում իշխանությունները կարող են սահմանափակել քաղաքացիների տեղաշարժը, սակայն օրենսդրությունն այս պարագայում չի սահմանում տունը լքելու արգելք և պարետային ժամի հաստատում։
Վերջին տվյալներով Ուկրաինայում գրանցվել է կորոնավիրուսի 113 դեպք։ Ընդհանուր առմամբ, Ուկրաինայում կորոնավիրուսից մահացել է 4 մարդ։ Ավելի վաղ, իշխանություններն սահմանափակել էին առևտրային կենտրոնների, սրճարանների, ռեստորանների և զվարճանքի կենտրոնների գործունեությունը։ Բացի այդ, Կիևում դադարեցվել է հանրային տրանսպորտի աշխատանքը։
Մեկնաբանել