Մեծ քսանյակի երկրները խոստացել են ստեղծել կորոնավիրուսի պանդեմիայի դեմ պայքարի միասնական ճակատ և համաշխարհային տնտեսության վրա կորոնավիրուսի պանդեմիայի ազդեցության մեղմացման նպատակով ներդնել 5 տրիլիոն դոլար։ Այդ մասին գրում է «Deutsche Welle»-ն։

«Այդ պանդեմիայի դեմ պայքարը պահանջում է թափանցիկ, հզոր, համակարգված, մասշտաբային և գիտականորեն հիմնավորված ընդհանուր պատասխան, որը կիրականացվի համերաշխության մթնոլորտում»,- նշվում է Մեծ քսանյակի երկրների համատեղ հայտարարության մեջ, որը հրապարակվել է մարտի 26-ին կայացած արտահերթ գագաթնաժողովից հետո։ Վերջինս կազմակերպվել էր առցանց տարբերակով։     

«Մենք հակված ենք այդ ընդհանուր սպառնալիքի դեմ ստեղծել միասնական ճակատ։ Մեծ քսանյակի երկրներն ավելի քան 5 տրիլիոն դոլար կներդնեն համաշխարհային տնտեսության մեջ՝ պանդեմիայի արդյունքում առաջացած սոցիալական, տնտեսական և ֆինանսական հետևանքները վերացնելու համար։ Այդ պատասխանի հզորությունը և մասշտաբները համաշխարհային տնտեսությանը հնարավորություն կտան նորից ոտքի կանգնել և ստեղծել ամուր հենասյուն՝ աշխատավայրերի պաշտպանության և տնտեսական աճի վերականգնման համար»,- նշվում է փաստաթղթի մեջ։

Մեծ քսանյակի երկրները, Արժույթի համաշխարհային ֆոնդի, Առողջապահության համաշխարհային կազմակերպության և տարածաշրջանային բանկերի միջոցով, խոստացել են արագ մշակել զարգացող երկրներին աջակցության ֆինանսական խոշոր փաթեթ։ Գագաթնաժողովի մասնակիցները պայմանավորվել են փոխանակվել կորոնավիրուսի դեմ պայքարի հետազոտական և այլ տվյալներով, ամրացնել առողջապահական համակարգերը և մեծացնել բժշկական սարքավորումների աճող պահանջարկին միտված առաջարկը։

«Ապագայի պաշտպանության համար մենք խոստանում ենք հզորացնել ազգային, տարածաշրջանային և գլոբալ հնարավորությունները՝ ինֆեկցիոն հիվանդությունների տարածման դեմ պայքարի շրջանակներում»,- նշվում է Մեծ քսանյակի երկրների գագաթնաժողովի մասնակիցների միացյալ հայտարարության մեջ։ Հիշեցնենք, որ ներկայումս Մեծ քսանյակը նախագահող երկիրը Սաուդյան Արաբիան է։

Լուսանկարը՝ primetimes.in-ի