Բրոնքսի կենդանաբանական այգու վագրերից մեկի մոտ հայտնաբերվել է կորոնավիրուս, մյուս վագրերի և առյուծների մոտ ևս նկատվում են հիվանդության ախտանիշները։ Այս մասին կիրակի օրը հայտնել է ԱՄՆ գյուղդեպարտամենտը։

Հանրային առողջության ոլորտի պաշտոնյաները կարծում են, որ կենդանիները վարակվել են կենդանաբանական այգու աշխատակիցներից մեկից, որի մոտ հայտնաբերվել է կորոնավիրուս։ Կենդանաբանական այգին փակ է եղել հանրության առջև մարտի 16-ից, իսկ առաջին վագրը սկսել է հիվանդության նշաններ ցույց տալ մարտի 27-ին։

Կենդանաբանական այգու գլխավոր անասնաբույժ Փոլ Քալլին «Reuters»-ի հետ հարցազրույցում հայտնել է, որ սա առաջին անգամն է աշխարհում, որ վարակը մարդուց անցնում է կենդանուն։

Մի քանի տնային կենդանիներ նախկինում վարակվել են SARS-CoV-2 տիպի վիրուսով, որն առաջացնում է COVID-19։ Կենդանիների մոտ այդ վարակը գրանցվել է Հոնկոնգում՝ պոմերանյան շպից և գերմանական հովվաշուն ցեղատեսակի շների մոտ և Բելգիայում՝ տնային կատվի մոտ։

«National Geographic»-ի հաղորդմամբ՝ մարտի վերջերին 4-ամյա մալայական վագր Նադիայի մոտ չոր հազ է նկատվել։ Ապրիլի 2-ին կենդանուն թեստավորել են և հայտնաբերել վարակը։ Երկու սիբիրական վագրեր և երեք աֆրիկյան առյուծներ ևս հազ ունեն, նրանց մոտ նկատվում է ախորժակի կորուստ, սակայն վերջիններիս չեն թեստավորել։ Փոլ Քալլեի խոսքերով՝ «Անհայտ է, թե հիվանդությունն ինչպես կզարգանա կենդանիների մոտ»։

Հիշեցնենք, որ Նյու Յորքը համարվում է Միացյալ Նահանգների կորոնավիրուսի բռնկման էպիկենտրոնը, քանի որ երկրում գրանցված կորոնավիրուսի դեպքերի մոտ կեսը գրանցվել է Նյու Յորքում։

 

 

 

 

 

View this post on Instagram

 

 

 

 

 

 

 

 

 

As a special #caturday treat, enjoy a moment of zen courtesy of our Malayan tigers. . . #bronxzoo #stayhome #zooandaquariumzen #tiger #tigers #bigcat #bigcats #catsofinstagram

A post shared by Bronx Zoo (@bronxzoo) on Apr 4, 2020 at 6:10am PDT

Վերջին տվյալներով՝ ԱՄՆ-ում գրանցվել է 336 851 վարակակիր, մահերի թիվը 9620 է։

Լուսանկարում՝ 2017թ․ նկարահանված վագրերից մեկն է։