Արսեն Թորոսյան․ «Օր-օրի, ցուցումների հետ մեկտեղ, թեստերի թիվը կավելանա»
Կառավարությունն այսօր՝ ապրիլի 13-ին, արտահերթ նիստ է հրավիրել։ Օրակարգը հաստատելուց հետո վարչապետը խնդրեց առողջապահության նախարարին տեղեկատվություն տալ կորոնավիրուսի մասին։
«Անցնող օրվա ընթացքում ունեցել ենք 26 նոր դեպք, գումարային դեպքերի թիվը դառնում է 1039։ Ընդհանուր բուժվածների թիվը դառնում է 211։ Այս պահին ակտիվ դեպքերի թիվը 814 է։ Շաբաթ և կիրակի բավական մեծ թվով թեստեր են արվել։ Շաբաթ օրը 680 թեստ է արվել, իսկ կիրակի՝ 467»,- հայտնեց նախարարը։
Վարչապետ Փաշինյանն էլ նշեց, որ գործնականում օրական 1000 թեստ անելու հնարավորություն ունենք․ «Պարզապես ցուցում պետք ա ունենանք, որ թեստ անենք, ուղղակի իմաստ չունի փողոցից մարդուն հրավիրել, ասել, եկեք Ձեզ թեստ անենք»։
Արսեն Թորոսյանի խոսքով՝ օր-օրի, ցուցումների հետ մեկտեղ, թեստերի թիվը կավելանա։
«Փաստացի այս պահի դրությամբ 6 լաբորատորիաներում են իրականացվում հետազոտությունները, և, հավանաբար, ևս մեկը կավելանա մոտակա մեկ շաբաթվա ընթացքում»,- նշեց նախարարը։
Մեկնաբանել