ԱԺ նախագահը նախազգուշացում հայտարարեց Էդմոն Մարուքյանին
Ազգային ժողովի նախագահ Արարատ Միրզոյանը նախազգուշացում հայտարարեց «Լուսավոր Հայաստան» խմբակցության ղեկավար Էդմոն Մարուքյանին:
Խորհրդարանը քվեարկության էր ներկայացրել «Լուսավոր Հայաստան» խմբակցության ներկայացրած «Ձերբակալված և կալանավորված անձանց պահելու մասին» օրենքում փոփոխություն կատարելու առաջարկը:
Նախագիծը չնայած առաջին ընթերցմամբ ընդունվել էր, սակայն երկրորդ ընթերցման ժամանակ այն չէր ստացել գլխադասային հանձնաժողովի դրական եզրակացությունը: Արդարադատության փոխնախարար Սրբուհի Գալյանը երեկ կոչ էր արել դեմ քվեարկել նախագծին, քանի որ նախագծի հեղինակը չէր համաձայնել Կառավարության առաջարկներին:
Քվեարկությունից առաջ վարման կարգով խոսեց ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը` կոչ անելով դեմ քվեարկել, քանի որ ըստ նրա՝ նախագիծը շեղվում է այն կարգավորումների տրամաբանությունից, որն ի սկզբանե նախատեսված էր:
Նախագիծը մերժվեց 34 կողմ, 79 դեմ ձայներով: Վարման կարգով քվեարկությունից հետո նախագծի վերաբերյալ խոսեց «Իմ քայլը» խմբակցության պատգամավոր Սուրեն Գրիգորյանը, սակայն տեղից ընդհատեց Էդմոն Մարուքյանը, ինչն առաջացրեց ԱԺ նախագահ Արարատ Միրզոյանի վրդովմունքը:
«Ինչ է նշանակում՝ դու ով ես, պարո՛ն Մարուքյան»,- ասաց Միրզոյանը, ապա ԱԺ կանոնակարգ-օրենքի համաձայն՝ նախազգուշացում հայտարարեց Մարուքյանին` պատճառաբանելով պատգամավորների հետ անհարգալից խոսելու հանգամանքը:
Մարուքյանն արձագանքեց` երեկվա քննարկմանը նույն պատգամավորն իրեն մանիպուլյատոր է անվանել, սակայն ԱԺ նախագահը նախազգուշացում չի հայտարարել, քանի որ իր խմբակցությունից էր:
Մեկնաբանել