Առաջիկա երկու-երեք շաբաթների ընթացքում Մոսկվան սպասում է հիվանդության տարածման գագաթնակետին
Մոսկվայում COVID-19 կորոնավիրուսի վարակման գագաթնակետն սպասվում է մայիսի սկզբին։ Այդ մասին տեսաուղերձի միջոցով ապրիլի 17-ին հայտարարել է Մոսկվայի փոխքաղաքապետ Անաստասիա Ռակովան։
«Առաջիկա շաբաթները կլինեն ամենածանրը մեզ համար։ Հիվանդության գագաթնակետը ամենայն հավանականությամբ կլինի առաջիկա 2-3 շաբաթների ընթացքում»,- նշել է Ռակովան։
Փոխքաղաքապետը հատուկ շնորհակալություն է հայտնել բժշկական բոլոր ծառայողներին։ «Համոզված եմ, որ տեսնելով ձեր ամենօրյա սխրանքները, մոսկվացիները առավել պատասխանատվությամբ և հոգատարությամբ կվերաբերեն սեփական առողջությանը և մյուսների անվտանգությանը, և շուտով Մոսկվան կվերադառնա կյանքի բնականոն ընթացքին»,- հավելել է նա։
Ապրիլի 16-ի դրությամբ Մոսկվայում գրանցվել է կորոնավիրուսի 16 146 դեպք։ Այս թիվը հրապարակել է Կորոնավիրուսի դեմ պայքարի դաշնային շտաբը։ Այս ցուցանիշով մայրաքաղաքն զբաղեցնում է առաջին հորիզոնականը Ռուսաստանում։ Ռակովան հայտարարել է, որ կորոնավիրուսի բռնկման սկզբից ի վեր ապաքինվել է կորոնավիրուսով հիվանդ 1517 պացիենտ։
Ապրիլի 16-ին, վերջին օրերի համեմատ առաջին անգամ, Մոսկվայում կորոնավիրուսի վարակակման նոր դեպքերի թիվը նվազել է։ Այն հայտնաբերվել է 1370 պացիենտների մոտ։ Ապրիլի 15-ից Մոսկվայում և Մերձմոսկվայում սահմանվել է անցագրային ռեժիմ։ Ինչպես հանրային, այնպես էլ մասնավոր տրանսպորտային միջոցներով երթևեկելու համար, անհրաժեշտ է QR կոդով անցաթուղթ։ Քաղաքի բնակիչներին թույլատրվում է տնից դուրս գալ միայն գործնական նպատակներով, մոտակա մթերային խանութ կամ դեղատուն գնալու, ինչպես նաև աղբը թափելու կամ շների հետ զբոսանքի համար։
Լուսանկարը՝ «Ֆրանսպրես» գործակալության
Մեկնաբանել