Ապրիլի 17-ին Արցախի առողջապահության նախարարությունը հայտնել է, որ նոր կորոնավիրուսի վարակ է հաստատվել Հանրապետական բժշկական կենտրոն տեղափոխված բուժանձնակազմի ներկայացուցիչներից մեկի մոտ, որը շփվել է Քարվաճառի բնակչի հետ։

Ստեփանակերտցի բուժաշխատողի ընտանիքի 7 անդամները մեկուսացվել են և գտնվում են մեկուսացման համար նախատեսված հյուրանոցում: 

Իսկ պարետի երեկվա որոշմամբ՝ Քաշաթաղի շրջանի Միրիկ, Մոշաթաղ և Ծիծեռնավանք համայնքներում նախկինում սահմանված՝ անձանց ազատ տեղաշարժի իրավունքի ժամանակավոր սահմանափակումները հանվել են:

«Հետքը» այս իրադարձությունների վերաբերյալ զրուցել է Տիգրան Աբրահամյանի հետ, որը Արցախում արտակարգ իրավիճակի իրավական ռեժիմի, երկրում տիրող համաճարակաբանական վիճակի և հարակից հարցերի վերաբերյալ մամուլի հետ կապերի պատասխանատուն է:

-Պարո՛ն Աբրահամյան, ինչո՞ւ հենց յոթ մեկուսացված: Չէ՞ որ, ամենայն հանավանականությամբ, բուժաշխատողը հաղորդակցվել է ուրիշ մարդկանց հետ ևս, ոչ միայն ընտանիքի անդամների հետ:

 -Կան ինքնամեկուսացված քաղաքացիներ: 

-Կա յոթ մեկուսացված, իսկ քանի՞ ինքնամեկուսացված:

-Այս պահին ինքնամեկուսացվածների թիվը չեմ կարող ասել: Բայց մի քանի տասնյակ ինքնամեկուսացված այս պահին, եթե չեմ սխալվում, կա: 

-Այդ ինքնամեկուսացվածները բուժաշխատողի շփան շրջանակի՞ց են:

-Այո՛, բնականաբար:   

-Իսկ ե՞րբ են մեկուսացրել բուժաշխատողին: 

-Այս պահին այն տեղեկատվությանն եմ տիրապետում, որը մենք երեկ պաշտոնական հաղորդագրությամբ տվել ենք: 

-Իսկ ընտրություններին մասնակցե՞լ է վարակված բուժաշխատողը կամ ընտանիքի անդամները:  

-Նման տեղեկատվության չեմ տիրապետում: 

-Բայց կարիք կա, չէ՞, պարզելու, պարոն Աբրահամյան:

-Եթե դրա վերաբերյալ լրացուցիչ տեղեկատվություն տեղեկակատվական շտաբին տրվի, կփոխանցենք: Ընտրողների ցուցակները հրապարակվում են, կարող եք նաև այնտեղ ծանոթանալ, ճշտումներ անել: Ուղղակի անհատական տվյալ է․ մենք անուն-ազգանունը չենք հրապարակել: 

- Ինչո՞ւ են Քաշաթաղի Միրիկ, Մոշաթաղ և Ծիծեռնավանք գյուղերի ազատ տեղաշարժի իրավունքի ժամանակավոր սահմանափակումները հանվել:  

-Դե, երեկ արդեն տեղեկացրել ենք, որ Քաշաթաղի երկու բնակիչ դուրս են գրվել: Այդ գյուղերի ինքնամեկուսացման հիմնական գործողությունները պայմանավորված էր հատկապես երկու քաղաքացիների վարակման դեպքով: Եվ քանի որ նրանք արդեն դուրս են գրվել, և համապասխան օրերը լրացել են, այդ պարագայում արդեն անհրաժեշտություն չկար: Եվ մի քաղաքացին՝ Միրիկի բնակիչը, այս պահին գտնվում է Հայաստանում, ընդհանուր վիճակը նրա բավարար է գնահատվում: Հույս ունենք՝ առաջիկա օրերին նաև կառողջանա: 

-Քանի՞ մեկուսացված կա: Ընդհանուր քանակը կասե՞ք: 

-Այս պահին 27 մեկուսացված քաղաքացի կա: 

-Պարո՛ն Աբրահամյան, կարիք չկա՞ հասարակությանն ասել, որ մնան տանը: Հասարակական տրանսպորտն այս պահին աշխատում է: Իսկ այս արևոտ օրերին զբոսնում են քաղաքում: 

-Եթե տրասնպորտի սահմանափակում լինի կամ տարբեր տնտեսական գործունեության վերաբերյալ սահմանափակման անհրաժեշտություն լինի, ապա պարետատունն այդ մասին կունենա համապատասխան որոշում: