Ֆիզիկայի ինստիտուտի շահառուներն ինստիտուտին հայտնել են, որ հոգաբարձուների խորհրդի նիստում իրենց հայտնած կոնֆիդենցիալ տեղեկությունները, եթե այլ անձի փոխանցվեն, ապա դատական հայցեր կներկայացնեն ինստիտուտի դեմ: Այս տեղեկությունն այսօր «Հետաքննող լրագրողներ» ՀԿ-ն ընդդեմ Ֆիզիկայի ինստիտուտի դատական գործի դատաքննության փուլում հայտնեց ինստիտուտի ներկայացուցիչ, փաստաբան Էմմա Հակոբյանը: Երևան քաղաքի ընդհանուր իրվասության դատարանում դատավոր Աննա Փիլոսյանի նախագահությամբ շարունակվում է ««Հետք»-ն ընդդեմ Ֆիզիկայի ինստիտուտի» դատական գործը: Այսօրվա դատաքննությունն իրականացվեց հեռահար ընթացակարգով՝ տեսակապի միջոցով:

«Հետք»-ը դիմել է դատարան, քանի որ ֆիզիկայի ինստիտուտը միայն 550 հազար դրամի դիմաց է պատրաստ ինստիտուտի հոգաբարձուների խորհրդի որոշումները տրամադրել: «Հետք»-ը դատարանից ակնկալում է վճիռ, որով այդ տեղեկություններն անվճար կտրամադրվեն լրատվամիջոցին:

«Գիտական կազմակերպության աշխատանքը կկազմալուծվի, եթե այդ տեղեկատվությունը տրամադրենք անվճար: Աշխատակիցներն էլ չեն համաձայնվում անվճար աշխատել»,- հայտարարեց պատասխանողի ներկայացուցիչ Էմմա Հակոբյանը: Նրա փոխանցմամբ՝ ինստիտուտում ունեն շահառուներ, որոնք արդեն հայտարարել են. «Եթե իրենց վերաբերող տեղեկատվությունը դառնա հանրության սեփականությունը, իրենք ներկայացնելու են ինստիտուտի նկատմամբ հայցեր՝ վնասների փոխհատուցման պահանջով»:

«Այսինքն, եթե ինստիտուտը լավ չֆիլտրի տեղեկատվությունը, ներքաշվելու է դատական հսկայական քաշքշուկների մեջ: Ինստիտուտը դրա համար կկարողանա տրամադրել ինֆորմացիա, եթե այդ ֆիլտրման աշխատանքը կատարվի, մարդիկ աշխատեն, ֆիլտրեն շատ մանրամասն, դրա համար ներկայացվել են փաստացի նախատեսվող ծախսերը: Գումարի մեջ ներկայացված չէ ղեկավարության աշխատանքը, որը պետք է աշխատի, ղեկավար կազմը հրաժարվել է վարձատրությունից, հոգաբարձուների խորհուրդն էլ պետք է նայի»,- ասաց Էմմա Հակոբյանը:

«Հետաքննող լրագրողներ» ՀԿ-ի ներկայացուցիչ, փաստաբան Գրիշա Բալասանյանն էլ նշեց, որ տեղեկատվության տրամադրման համար պահանջվող 550 հազար դրամը մեծ բեռ է ԶԼՄ-ի համար: «Եթե  տեղեկատվություն տնօրինողն ամեն անգամ նման ծախս ներկայացնի տեղեկություն տրամադրելու համար, ապա ԶԼՄ-ի գործունեությունը կխոչընդոտի: Դրանով խախտվում է Եվրոպական կոնվենցիայի 10-րդ հոդվածը: Լրագրողը տեղեկատվությունը անձնական նպատակով չի վերցնում, այլ դրանք դարձնում է հանրության սեփականությունը»,- ասաց Գրիշա Բալասանյանը:

Փաստաբանը նաև նշեց, որ հայցվորի դիրքորոշումը չի փոխվել, և տեղեկատվությունը պետք է անվճար տրամադրվի, քանի որ տեղեկատվության տրամադրման համար գործադիրի սահմանած վճարները վերաբերում են թղթի պատճենահանմանը, կրիչին և այլնին, այլ ոչ թե տեղեկություն տրամադրելուն:

Գրիշա Բալասանյանը եւս մեկ անգամ ճշտեց՝ արդյո՞ք դատարանը ստացել է իր և «Հետաքննող լրագրողներ» ՀԿ-ի միջև կնքված փաստաբանական ծառայության պայմանագիրը: Դրական պատասխան տալուց հետո նախագահող դատավոր Աննա Փիլոսյանը պատասխանողի ներկայացուցչից ճշտեց, թե նա ինչպիսի դիրքորոշում ունի գումարի ողջամտության վերաբերյալ: Պատասխանողի ներկայացուցիչը ողջամիտ համարեց պայմանագրի գինը, սակայն միջնորդեց հետաձգել նիստը, որպեսզի պատասխանողը նույնպես փաստաբանական ծախսերի համար պայմանագիր ներկայացնի դատարան:

Նիստը հետաձգվեց։ Հաջորդը դատական նիստը տեղի կունենա մայիսի 4-ին: