COVID-19 կորոնավիրուսի դեմ պայքարում ռեմդեսիվիր հակավիրուսային միջոցի արդյունավետությունը հաստատվել է զանգվածային կլինիկական փորձարկումների արդյունքում։ Այդ մասին գրում է «BBC»-ն։ 

Հետազոտությունները շարունակվում են, դեռևս ամփոփվել են միայն միջոցի կիրառման նախնական արդյունքները։ Այդուհանդերձ, նախնական տվյալներն այնքան համոզիչ են, որ ԱՄՆ ալերգիայի և ինֆեկցիոն հիվանդությունների ազգային ինստիտուտը հանդես է եկել հատուկ հայտարարությամբ, որտեղ հաստատել է հակավիրուսային միջոցի արդյունավետությունը։

«Տվյալները ցույց են տալիս, որ ռեմդեսիվիրը ունենում է միանշանակ դրական էֆֆեկտ՝ նպաստելով ապաքինմանը»,- լրագրողներին հայտարարել է NIAID-ի ղեկավար Էնթոնի Ֆաուչին։ Փորձարկմանը, որն սկսվել էր ավելի քան երկու ամիս առաջ՝ փետրվարի 21-ին, մասնակցում են ԱՄՆ-ի, Ասիայի և Եվրոպայի 1000-ից ավելի պացիենտներ, որոնց մոտ հաստատվել էր COVID-19 կորոնավիրուս։

Հետազոտողներն օգտագործում են անանուն կրկնակի թեստավորման մեթոդը։ Հիվանդներին բաժանում են երկու խմբի։ Խմբերից մեկի պացիենտներն ստանում են ռեմդեսիվիր (ի հավելումն սովորական ախտանշանային բուժմանը), իսկ մյուս խմբի պացիենտները՝ պլացեբո։ Ընդ որում, թե որ խմբում է գտնվում կոնկրետ պացիենտը, չգիտեն ոչ պացիենտը և ոչ էլ բուժող բժիշկը։ Նախնական տվյալներով՝ հիվանդները, որոնք ստացել են փորձարարական միջոցը, բուժվում են գրեթե 1,5 անգամ ավելի արագ (միջինում 11 օր), այն դեպքում, երբ մյուս խումբը բուժվում է միջինում 15 օրում։

Տարբերություն կա նաև մահացության ցուցանիշներում, չնայած այն այդքան էլ նշանակալի չէ։ Պլացեբո ստացողների խմբում մահացության ցուցանիշը կազմել է 11,6 %, իսկ փորձարարական խմբում՝ 8 %:

Եթե հետազոտության վերջնական արդյունքները էականորեն չտարբերվեն միջանկյալ արդյունքներից, ապա ռեմդեսիվիրը կդառնա առաջին դեղը, որը հաջողությամբ անցել է COVID-19 կորոնավիրուսի դեմ պայքարի կլինիկական փորձարկումները։ 

Կորոնավիրուսի դեմ պատվաստանյութը մինչ օրս չի հայտնաբերվել։ Պացիենտներին տրամադրվում է միայն ախտանշանային բուժօգնություն, այսինքն պայքարը գնում է ոչ թե ինֆեկցիայի դեմ, այլ՝ դրա հետևանքների ու ախտանիշների։ 

«Հիմա մենք ունենք բավարար տվյալներ, որպեսզի դիտարկենք հնարավորությունն արտակարգ կերպով բժիշկներին թույլատրել ռեմդեսիվիրի կիրառումը», «Twitter»-ի իր էջում գրել է ԱՄՆ Սննդամթերքի և դեղորայքի որակի սանիտարական վերահսկողության վարչության նախկին ղեկավար Սքոթ Գոթլիբը։

As we've been saying for some time now, accumulating data on Remdesivir suggests it's active against covid and there's now enough data to support consideration of access under an emergency use authorization by FDA. The data from NIAID study should push this firmly over the line. https://t.co/UPxPw5ebEz

— Scott Gottlieb, MD (@ScottGottliebMD) April 29, 2020

Հետաքրքական է, որ մեկ օր առաջ «Lancet» պարբերականում հրապարակվել են մեկ այլ հետազոտության արդյունքներ, որտեղ դարձյալ ուսումնասիրվել էր ռեմդեսիվիրի ազդեցությունը կորոնավիրուսի վրա։ Գիտափորձն իրականացվել էր Չինաստանում և տվել հակառակ արդյունքը։ Դրա արդյունքում հնարավոր չէր եղել հաստատել դեղամիջոցի արդյունավետությունը։ Սակայն փորձագետները նշում են, որ չինական ուսումնասիրությունը, որն իրականացվել է ընդամենը 237 պացիենտների վրա, չի հանդիսանում բավականաչափ ներկայացուցչական, որպեսզի հնարավոր լինի հանգել նման եզրակացության։ Գիտափորձը նույնիսկ ժամանակից շուտ ընդհատվել է։ Պատճառը մասնակիցների ոչ բավարար թիվն էր։

Ռեմդեսիվիրը նուկլեոտիդների անալոգների դասին պատկանող նոր հակավիրուսային դեղամիջոց է։ Պատկանում է հակավիրուսային դեղամիջոցներին, որոնք արգելակում են ՌՆԹ կախյալ ՌՆԹ-պոլիմերազին։ Ֆերմենտն անհրաժեշտ է ՌՆԹ վիրուսների ռեպլիկացիայի համար։ Դեղամիջոցը արգելակելով այդ ֆերմենտի ակտիվությունը՝ արգելակում է վիրուսների կրկնապատկումը։ Դա է պատճառը, որ այն օգտագործվում է ՌՆԹ-պարունակող վիրուսների դեմ, օրինակ՝ Էբոլայի վիրուսի, Մարբուրգի վիրուսի, Լասսայի տենդի վիրուսի, Նիպահի վիրուսի, Հենդրայի վիրուսի և կորոնավիրուսների։ 

Լուսանկարը՝ «Ֆրանսպրեսս» գործակալության