HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ժաննա Սարգսյան

Մարիամ Սուխուդյան. «Մի քանի օրում եթե այս անօրինական կրպակները չապամոնտաժվեն, մենք ենք դա անելու մեր ուժերով» (վիդեո)

Երևանը նման Մարտի 8 չէր տեսել: Մաշտոցի այգի հրավիրված բազմաթիվ կանայք, անկախ նրանից, թե որքանով էին նախորդ շաբաթներին մասնակցել այգու պաշտպանությանը, անմասն չմնացին ինքնաբուխ միջոցառումներից:

Տղամարդկանց զատել իրենցից, դեմ գնալ պատնեշներին ու ոստիկանությանը և միաժամանակ կարգապահ լինել. հայուհու նոր տեսակն էր այսօր Մաշտոցի պուրակում: Արդյունքում թմբուկ-ծնծղայով ու ավանդական յարխուշտայով տոնվեց հանրային տարածքների պատնեշաթափումը:

Այսուհետ Մաշտոցի պուրակի պահապաններն իրականացնելու են «հանրային անկախ ու արդար դատավարություններ», իսկ կիսակառույց տաղավարները գտնվում են կալանքի տակ:

Ակտիվիստ կանայք ու աղջիկները վստահեցնում են` արդեն 27 օր հանրության` անտարբերության մատնված ձայնը չի լռելու: Այգին պահպանվելու է նստացույցերի ու զանազան միջոցառումների շնորհիվ, իսկ տոներից հետո, երկրորդ աշխատանքային օրը քաղաքապետարանից արձագանք չստանալու դեպքում բնապահպան կանայք կհայտարարեն շուրջօրյա նստացույց:

«Մենք պատրաստ ենք այգում շուրջօրյա հերթապահել, սակայն մի քանի օրում  եթե այս անօրինական կրպակները չապամոնտաժվեն, մենք ենք դա անելու մեր ուժերով»,-կանանց յուրատեսակ տոնի ավարտին հայտարարեց Մարիամ Սուխուդյանը: 

Կոչ և հայտարարություն ՀՀ քաղաքացիական պետության բոլոր քաղաքացիներին և բնակիչներին (Երևան, 8 մարտի, 2012) 

Կրկին և լիարժեք կերպով տերը դառնալով մեր հանրային տարածքին և սեփականությանը և գործելով հանուն հանրային շահի, հիմք ընդունելով ՀՀ Սահմանադրությունը և մասնավորապես երկրորդ հոդվածը, այն է` Հայաստանի Հանրապետությունում իշխանությունը պատկանում է ժողովրդին, ՀԱՅՏԱՐԱՐՈՒՄ ԵՆՔ.

արդեն 27 օր է, ինչ մենք` ՀՀ քաղաքացիներս ու բնակիչներս, կենսագործում ենք մեր Սահմանադրական իրավունքներն ու պարտականությունները և լինելով այս հանրային տարածքի ու սեփականության տերը, մեր քաղաքի և պետության տերը` պահանջել ենք մեր ծառայողներից` քաղաքային և այլ մարմինների ներկայացուցիչներից, կատարել իրենց սահմանդրական գործառույթներն ու պարտականությունները, որի համար էլ վճարվում են հանրության կողմից: Մեր հստակ ու օրինական պահանջին նրանք արդեն ինչքան ժամանակ է որևէ հստակ և իրավական պատասխան չեն տալիս, այլ խուսափում են, փորձում են խճճել կամ երկարաձգել գործընթացը: Փաստելով նրանց անգործությունը` մենք կյանքի ենք կոչում «Քաղաքացիական անկախ ու արդար դատարան», որը կոչված է քննելու հանրային ունեցվածքի ու ազգային հարստության զավթման, կողոպտման, մասնավորեցման հիմնախնդիրը մեր պետությունում: Քաղաքացիական անկախ և արդար դատարանի գործընթացների հիմքում դրվելու են ՀՀ սահմանադրական իրավունքները, մարդու հիմնարար իրավունքներն ու ազատությունները: Բոլոր դատավարությունները լինելու են թափանցիկ, բաց և հրապարակային: Կատարվելու է օնլայն հեռարձակում: Բոլորի մուտքն ազատ է ու մասնակցությունը` խրախուսելի: Դատական առաջին նիստի ժամանակ կներկայացվի դատավարության ընթացակարգը և պատիժները: Դատարանի ընդունած որոշումներն անբեկանելի են ու ենթակա են անհապաղ իրականացաման:

Բոլոր քաղաքացիներն ու բնակիչները, կազմակերպությունները, միությունները և այլ տեսակի կառույցները, որոնց հանրային սեփականությունը կամ ունեցվածքը խլվել կամ կողոպտվել է, կարող են դիմել Քաղաքացիական անկախ ու արդար դատարանին այստեղ` Մաշտոցի պուրակում, տրամադրել տեղեկատվությունը և հայց ներկայացնել դատարան գործը քննելու համար: Բոլոր այն քաղաքացիները, բնակիչները, որոնց մասնավոր սեփականությունը խլվել է «հանրային շահի համար» նույնպես կարող են դիմել մեզ` արդարացի, ժողովրդական և անկախ որոշում ստանալու համար: Կոչ ենք անում բոլոր գյուղերի, քաղաքների, մարզերի քաղաքացիաներին ու բնակիչներին` Քաջարանից մինչև Թեղուտ, Մաշտոցի պուրակից մինչև Դալմայի այգիներ, միանալ մեր քաղաքացիական անկախ ու արդար հրապարակային դատավարություններին` իրենց իրավունքների և մեր բոլորիս քաղաքացիական պետության կերտմանն ի խնդիր:

Քաղաքացիական անկախ ու արդար դատարանի առաջին հրապարակային դատական նիստը տեղի կունենա մարտի 13-ին` ժամը 13.00-ին, Երևանի Մաշտոցի պուրակում: Առաջին գործը Մաշտոցի պուրակի հանրային տարածքի ու սեփականության պաշտպանության դատն է, որտեղ հանրությունը հադես է գալու ընդդեմ քաղաքային իշխանությունների:

Մինչ վճռի հրապարակումը, դատարանի որոշումով, Մաշտոցի պուրակի գույքը կալանքի տակ է առնվում:


Մեկնաբանություններ (1)

Գեւորգ
Կարելի է կարծել թե այս երկրում օրենք, օրինականություն, արդարության գերակայություն ... վերացված են արդեն: Այսինքն՝ պետականության լիակատար նիհիլիզմ: Այս ակցիայի ամեն մի օրը աշխարհին ցուցադրում է վճիռ կայացնողների շվարածությունն ու «դեբիլ» հոգեբանությունը: А если завтра война???

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter