Մոսկվայում առանց գումարի և աշխատանքի մնացած չորս անչափահաս երեխաներ ունեցող ընտանիքն արդեն վերադարձել է աշխատանքային առօրյային։ «Հետքի» հրապարակումից հետո նրանք օգնություն են ստացել Ռուսաստանում և Հայաստանում բնակվող հայերից։

Ընտանիքի մայրը՝ Քրիստինե Խաչատրյանը, պատմեց, որ ամուսինը, որդին և եղբայրն արդեն երեք օր է` աշխատում են։

• «39 ռուբլի էլ չունենք, որ ալյուր առնենք». 4 անչափահաս երեխա ունեցող ընտանիքը Ռուսաստանից չի կարողանում Հայաստան վերադառնալ

Ընտանիքը Հայաստանում և Ռուսաստանում բնակվող հայերից 200 դոլար է ստացել։ Օգնություն ստացած գումարով կարողացել են վճարել տան վարձի զգալի մասը և շարունակել բնակվել նույն տանը։

Նրանց է այցելել նաև Մոսկվայի Հայ Առաքելական Եկեղեցու հոգևորականներից մեկը, սնունդ տարել։

Օրեր առաջ էլ Էլեկտրոստալ քաղաքում բնակվող հայերն են այցելել ընտանիքին, կրկին սնունդ տարել և աշխատանք առաջարկել։ Քրիստինեի ամուսինը, եղբայրը և 17-ամյա որդին արդեն երեք օր է՝ աշխատում են շինարարությունում։ Քրիստինեն ասում է՝ աշխատանք ունենալը իրենց համար մեծ օգնություն է, քանի որ ստացած աշխատավարձով կկարողանան տան վարձը վճարել և առօրյա հոգսերը հոգալ։

Քրիստինեն խնդրեց իր շնորհակալությունը հայտնել բոլոր օգնողներին. «Շնորհակալ եմ, որ այս դժվարին օրերին մեր կողքին էին, կարողացան և սնունդով, և գումարով օգնել»,- ասաց նա։

Երեկ Քրիստիեն Խաչատրյանի ամուսնուն՝ Գևորգ Մաթևոսյանին, զանգահարել են Ռուսաստանի Դաշնությունում Հայաստանի դեսպանությունից։ Նրանից հետաքրքրվել են՝ արդյոք դեռևս ցանկանում են վերադառանալ Հայաստան, թե ոչ։ Դեսպանատան ներկայացուցիչը ընտանիքի անդամներին առաջարկել է նաև աշխատանք Վորոնեժ քաղաքում, սակայն չեն համաձայնել՝ ասելով, որ արդեն աշխատանք ունեն։