HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Առողջապահության նախարարությունը չի հիմնավորում հրատապ գնումների գործարքներին հետադարձ ուժ տալու անհրաժեշտությունը

Կառավարությունը և Առողջապահության նախարարությունն այդպես էլ չեն պարզաբանում, թե ինչու է կառավարության 2020 թ.-ի մարտի 12-ի թիվ 296-Ա որոշմանը հետադարձ ուժ տրվել, ինչը լուրջ ռիսկեր է պարունակում: Նշված որոշման հիման վրա, կորոնավիրուսային վարակի (COVID-19) կանխարգելման, վերահսկման, բուժման և այլ համալիր միջոցառումների շրջանակում, պետական մարմիններն ու ՏԻՄ-երը գնումների գործարքները կարող են կատարել առանց գրավոր պայմանագրերի կնքման՝ վճարումները կատարելով նաև հաշիվ-ապրանքագրի կամ հսկիչ դրամարկղային մեքենայի կտրոնի հիման վրա, ինչպես նաև բացառիկ դեպքերում՝ առանց վերջիններիս առկայության:

Ապրիլի 14-ի մեր գրավոր հարցումը կառավարությունը մեզ համար անհասկանալի պատճառներով հասցեագրել էր Առողջապահության նախարարությանը, որտեղից 31 օր անց այդպես էլ հստակ տեղեկություններ չտրամադրեցին: Առհասարակ, Առողջապահության նախարարությունը վերջին ամիսներին որդեգրել է հարցումների պատասխանները ձգձգելու և, ի վերջո, չտրամադրելու քաղաքականություն: Նույնիսկ ամենապարզ հարցին պատասխանելու համար, որը հնարավոր է անել 1-2 ժամվա ընթացքում, նախարարությունը խնդրում է 30-օրյա ժամկետ, որի հետեւանքով թեման կորցնում է արդիականությունը: Ենթադրում ենք, որ նախարարությունն այդպիսով ուզում է կանխել անցանկալի հրապարակումները։ Նախարարության գործելաոճի հետևանքով տեղեկատվություն հայցելը դարձել է աննպատակահարմար, զուտ ժամանակի կորուստ:

Հիշեցնենք, «Հետք»-ը գրել էր, որ Հայաստանում կորոնավիրուսային վարակի (COVID-19) կանխարգելման, վերահսկման, բուժման և այլ համալիր միջոցառումների շրջանակում կառավարությունն այս տարվա մարտի 12-ին որոշում է ընդունել, որով հեշտացվել են գնման գործընթացները: Նշված նպատակով իրականացված մեկ անձից գնումներն այլևս չեն սահմանափակվում գնման առարկայի ամբողջ ծավալով ձեռքբերման ժամկետով՝ 30 օրացուցային օրով, չեն իրականացվում էլեկտրոնային համակարգի միջոցով: Գործարքները կարող են կատարվել առանց գրավոր պայմանագրերի կնքման՝ վճարումները կատարելով նաև հաշիվ-ապրանքագրի կամ հսկիչ դրամարկղային մեքենայի կտրոնի հիման վրա, ինչպես նաև բացառիկ դեպքերում՝ առանց դրանց առկայության:

Ուշագրավն այն է, որ կառավարության որոշման պահանջները տարածվում են 2020թ. հունվարի 25-ից ծագած գործարքների վրա: Ըստ էության, կառավարության որոշումը հետադարձ ուժ է ստացել, ինչը, կասկածից բացի, մեծ ռիսկեր է պարունակում

Փաստաբան Արա Ղազարյանը նույնպես ռիսկեր էր տեսնում կառավարության նշված որոշման մեջ, քանի որ դրանով հնարավոր է ինչ-ինչ իրավական գործընթացներ սրբագրել, գուցե նրա համար, որ այլևս հնարավոր չէ post factum հիմնավորել, որ հրատապություն կար, կամ ինչու գնումը կատարվեց մեկ անձից:

Մեր պարզ հարցերին, թե ինչո՞վ է պայմանավորված կառավարության որոշմանը հետադարձ ուժ տալը, ինչու՞ է ընտրվել հենց հունվարի 25-ը, ի՞նչ թվային տվյալներ են հիմք ընդունվել, որով պայմանավորվել է որոշման ընդունման անհրաժեշտությունը՝ տալ հետադարձ ուժ, առողջապահության նախարությունը տվել է «դիվանագիտական» պատասխան՝ ըստ էության չպատասխանելով և ոչ մի հարցի:

«Տարվա սկզբից տարբեր երկրներում կորոնովիրուսային (COVID-19) հիվանդության վարակվածության դեպքերի հայտնաբերումից հետո, առողջապահության նախարարության, հանձինս իր ենթակայության կազմակերպությունների և այլ իրավասու պետական գերատեսչությունների կողմից իրականացվել են Հայաստանի Հանրապետությունում կորոնավիրուսային վարակի (CՕVID-19) կանխարգելման, վերահսկման, բուժման և այլ համալիր միջոցառումներ: ՀՀ կառավարության 2020 թվականի մարտի 12-ի թիվ 296-Ա որոշման ընդունումը կարգավորել է մի շարք կազմակերպչական, ֆինանսական հարցեր, որոնք ի հայտ են եկել ՀՀ-ում կորոնավիրուսային(COVID-19) հիվանդության կանխարգելման, վերահսկման, բուժման և այլ համալիր միջոցառումների իրականացման ընթացքում»,- գրավոր պատասխանել է Առողջապահության նախարարության գլխավոր քարտուղարի տեղակալ Վահե Հակոբյանը:

Իսկ այն հարցին, թե հունվարի 25-ից մինչև մարտի 12-ն ընկած ժամանակահատվածում քանի՞ գործարքի վրա են տարածվել կառավարութան թիվ 296-Ա որոշման պահանջները, Վ. Հովհաննիսյանը նշել է, թե Առողջապահության նախարարության ենթակայության կազմակերպությունների կողմից նշված ժամանակահատվածում իրականացված գործարքների թիվը, որոնց վրա տարածվում են կառավարության մարտի 12-ի թիվ 296-Ա որոշման պահանջները, կազմում է 10 գործարք:

Առողջապահության նախարարությունը, խեղաթյուրելով հարցը, մասնակի պատասխան է տվել՝ նշելով միայն իր գնումների մասին: Նախարարությունը չի նշել, որ չի տիրապետում այլ պետական մարմինների և ՏԻՄ-երի գնումների մասին տեղեկատվությանը, պարզապես նեղացրել է շրջանակը, որպեսզի չտրամադրի վիճելի որոշման հիմքում ընկած գործարքների ամբողջական թիվը: Նշենք, որ Կառավարության հիշատակված որոշման համաձայն՝ պետական կառավարման մարմինների ղեկավարները, իսկ Տարածքային կառավարման և ենթակառուցվածքների նախարարությունը մարզպետարանների իրականացրած միջոցառումներից հետո Առողջապահության նախարարություն պետք է ներկայացնեն իրականացված փաստացի ծախսերի վերաբերյալ հաշվետվություն, նույնը առաջարկվում է անել նաև Երևանի քաղաքապետին:

Հետաքրքրվել էինք նաև, թե հունվարի 25-ից մինչև մարտի 12-ն ընկած ժամանակահատվածում ո՞ր գերատեսչությունների (պետական հիմնարկ) գործարքների վրա են տարածվել կառավարության թիվ 296-Ա որոշման պահանջները: Նախարարությունը դարձյալ տվել է «վերացական» պատասխան:

«ՀՀ կառավարության 2020թ. մարտի 12-ի թիվ 296-Ա որոշման պահանջները տարածվել են բոլոր այն պետական մարմինների, ինչպես նաև վերջիններիս ենթակայության այն կազմակերպությունների կողմից իրականացված գործարքների վրա, որոնք իրենց վերապահված գործառույթների և լիազորությունների շրջանակում իրականացրել են Հայաստանի Հանրապետությունում կորոնավիրուսային վարակի (CՕVID-19) կանխարգելման, վերահսկման, բուժման և այլ համալիր միջոցառումներ»,-նշված է պատասխանում:

Արդարադատության նախարարությունից ևս հետաքրքրվել էինք, թե որն է կառավարության որոշմանը հետաադարձ ուժ տալու անհրաժեշտությունը: ԱՆ-ի գլխավոր քարտուղար Սուրեն Գալստյանը պատասխանել է, թե Արդարադատության նախարարությունում ուսումնասիրվել է գրությամբ մատնանշված Կառավարության մարտի 12-ին ընդունված թիվ 296-Ա որոշումը և, հաշվի առնելով այն հանգամանքը, որ հիշյալ որոշումը չի մշակվել Արդարադատության նախարարության կողմից, հետևաբար «Տեղեկատվության ազատության մասին» օրենքի 3-րդ հոդվածի իմաստով նախարարությունը չի հանդիսանում տեղեկատվություն տնօրինող՝ հայտնում են, որ հայցվող տեղեկատվության վերաբերյալ նախարարությունը դիրքորոշում չի կարող հայտնել։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter