![](/static/articles/11/73/07/l-4zYDRwb17R.jpg)
Ռուսաստանում կորոնավիրուսից բուժծառայողների մահացությունը 16 անգամ ավելի բարձր է, քան կորոնավիրուսով առաջատար մյուս երկրներում
Ռուսաստանում կորոնավիրուսից, ընդհանուր առմամբ, մահացել է 186 բուժծառայող, ինչը նշանակում է, որ COVID-19 կորոնավիրուսից մահացած բուժծառայողների թիվը միջինում 16 անգամ ավելի բարձր է, քան վարակվածության համանման ցուցանիշներ ունեցող այլ երկրներում։ Այդ մասին գրում է «Медиазона»-ն։
Որպես հիմք լրագրողներn ընդունել են «Список памяти» նախագիծը, որը կազմել են ռուս բժիշկները։ Այստեղ ներառված են այն բուժաշխատողների անունները, որոնք մահացել են կորոնավիրուսի համավարակի արդյունքում։ Մայիսի 18-ի դրությամբ ցանկում ներառված է եղել 222 անուն, իսկ մեկ օր անց՝ արդեն 241։ «Медиазона»-ն ցանկից բացառել է 19 դեպք․ այլ երկրներից 6 բժշկի, 7 բուժծառայողի, որոնք չեն աշխատել կորոնավիրուսի համավարակի պայմաններում և վեց այլ բժշկի, որոնց մահը կապված չէ կորոնավիրուսի հետ։ Մնացած 203 դեպքերի պարագայում լրագրողները հաստատել են, որ COVID-19 կորոնավիրուսից մահացել է 165 բուժծառայող, 38-ի մասին տեղեկատվություն չի հայտնաբերվել։
Մասնավորապես, նախագծի կայքից պարզ է դառնում, որ միայն Դաղստանում կորոնավիրուսից մահացել է 34 բուժծառայող։ Հանրապետության առողջապահական գերատեսչության ղեկավար Ջամալուդին Հաջիիբրահիմովը հայտարարել է, որ թոքաբորբից և կորոնավիրուսից Դաղստանում մահացել է ավելի քան 40 բուժծառայող, այդ իսկ պատճառով «Медиазона»-ն Դաղստանի բոլոր դեպքերը համարել է հաստատված։ Այդուհանդերձ, Ռուսաստանի կազմում գտնվող հանրապետության առողջապահության նախարարությունը պնդում է, որ ավելի քան 40 բուժծառայող մահացել է ոչ միայն թոքաբորբից և կորոնավիրուսից։ Լրագրողները գտել են տեղեկատվություն ևս 8 ռուս բժշկի մասին, որոնք ավելի վաղ չեն եղել ցուցակում։
Բուժծառայողների մահացության ցուցանիշներով առաջին չորս հորիզոնականները զբաղեցնում են Մոսկվան, Մերձմոսկվան, Դաղստանը և Սանկտ Պետերբուրգը։ Մահացածների կեսը կրտսեր և միջին օղակի բուժանձնակազմի ներկայացուցիչ է։ Ամենից հաճախ կորոնավիրուսից Ռուսաստանում մահանում են բուժքույրերը և բուժեղբայրները։ Միայն մայիսի 18-ին մահացել է 38 բուժծառայող։
Ընդհանուր առմամբ, Ռուսաստանում կորոնավիրուսից մահացել է 2 772 մարդ։ Ստացվում է, որ Ռուսաստանում կորոնավիրուսից մահացած յուրաքանչյուր 15-րդ անձը բուժծառայող է, ինչը կազմում է մահացածների ընդհանուր թվի 7 %-ը։ Այս թիվը միջինում 16 անգամ ավելի բարձր է, քան Իտալիայում, Մեծ Բրիտանիայում, Իրանում, Գերմանիայում, ԱՄՆ-ում և Իսպանիայում, որոնք վարակվածության ցուցանիշներով մոտ են Ռուսաստանին։
Վերջին տվյալներով` Ռուսաստանում գրանցվել է կորոնավիրուսի 299 941 դեպք։ Մահացածների թիվը հասել է 2 837-ի, իսկ ապաքինվածների թիվը՝ 76 130-ի։
Լուսանկարը՝ «Bloomberg» գործակալության
Մեկնաբանել