Ֆինանսների նախարարությունը նախատեսում է բուքմեյքե­րական գրասենյակի, խաղասրահում վիճակախաղի (տոտալիզատոր) կազմակերպման համար պահանջներ սահմանել։

Ֆինանսների նախարարությունը նման փոփոխություն կատարելու առաջարկ է ներկայացրել իրավական ակտերի միասնական կայքում։

Ըստ առաջարկվող փոփոխության՝ բուքմեյքե­րական գրասենյակի կամ խաղասրահում վիճակախաղ կարող է կազմակերպվել միայն շինությունում։ Իսկ այդ շինությունը պետք է զբաղեցնի շենքն ամբողջությամբ կամ լինի դրա մեջ առանձնացված մեկ միասնական ոչ բնակելի տարածք:

Այդ շինությունները կրթական և պատմամշակութային հաստատություններից, պետական և տեղական ինքնակառավարման մարմինների վարչական շենքերից, հիվանդանոցների տարածքներից պետք է ունենան տարբեր հեռավորություններ։

Մասնավորապես՝ Երևանի վարչական շրջաններում՝ ուղիղ գծով առնվազն 150 մետր, Կոտայքի մարզկենտրոնում և Ծաղկաձորում, Գեղարքունիքի, Արարատի, Արմավիրի, Արագածոտնի, Լոռու և Շիրակի մարզկենտրոններում` ուղիղ գծով առնվազն 100 մետր, իսկ Վայոց ձորի մարզկենտրոնում, Ջերմուկում, Սյունիքի մարզկենտրոնում, Մեղրիում և Տավուշի մարզկենտրոնում` ուղիղ գծով առնվազն 50 մետր հեռավորության վրա։

Վիճակախաղի կազմակերպման գործունեության իրականացման համար նախատեսված խաղասրահների, բուքմեյքերական գրասենյակների յուրաքանչյուր սպասարկման սրահի մակերեսը չպետք է գերազանցի 200 քառակուսի մետրը։

Շինության նախասրահը պետք է գտնվի խաղասրահի կամ բուքմեյքերական գրասենյակի հիմնական մուտքին հարակից առանձնացված սրահում։ Այնտեղ պետք է իրականացվեն հաճախորդների նույնականացումը՝ բացառելով քսանմեկ տարին չլրացած ֆիզիկական անձանց և դատարանի օրինական ուժի մեջ մտած վճռով մոլեխաղերով հրապուրվելու հետևանքով իր ընտանիքին նյութական ծանր դրության մեջ դնելու հիմքով սահմանափակ գործունակ ճանաչված անձանց մուտքը։

Նախարարության հաղորդմամբ՝ մինչ այս բուքմեյքե­րական գրասենյակի կամխաղասրահում վիճակախաղի գործունեության իրականացման վայրերի նկատմամբ նման չափանիշներ սահմանված չեն եղել։ Այս փոփոխություններով Ֆինանսների նախարարությունը նպատակ ունի բարձրացնել այդ ոլորտի նկատմամբ վերահսկողությունը։

«Ներկայում վիճակախաղի կազմակերպումն իրականացվում է ՀՀ ողջ տարածքում, ընդ որում՝ դրանց գերակշիռ մասը տեղակայված է բնակավայրերի մարդաշատ վայրերում: Այս փաստը բացասական ազդեցություն է թողնում հասարակության վրա` վիճակախաղերով հրապուրվելու վտանգ ստեղծելով»,- հայտնել է Ֆինանսների նախարարությունը։

Նախարարությունն այս նախագիծը մշակել է միջազգային փորձի ուսումնասիրությամբ։ Այդ ուսումնասիրությունները ցույց են տվել, որ բուքմեյքե­րական գրասենյակի,խաղասրահում վիճակախաղի կազմակերպման գործունեության իրականացման վայրի նկատմամբ տարածքային սահմանափակումների սկզբունքները նույնատիպ են։

Ընթերցեք նաև 

• Ովքեր իրավունք կունենան գնալ խաղասրահներ և մասնակցել ինտերնետային վիճակախաղերին. նոր նախագիծ