Այս տարվա ապրիլին, նախորդ տարվա նույն ամսվա համեմատ, Հայաստանի տնտեսական ակտիվության ցուցանիշը (ՏԱՑ) նվազել է 17.2%-ով։ Այս մասին են վկայում Վիճակագրական կոմիտեի (ՀՀ ՎԿ) հրապարակած օպերատիվ ցուցանիշները։

Ինչպես մարտին, այնպես էլ ապրիլին՝ ամենամեծ անկումը գրանցվել է շինարարության ոլորտում։ Շինարարության ծավալներն այս տարվա ապրիլին, նախորդ տարվա նույն ամսվա համեմատ, կրաճատվել են 51%-ով։

Ներքին առևտրաշրջանառությունը կրճատվել է 33.1%-ով:

Ծառայությունների ծավալը՝ 15.9%-ով։

Արդյունաբերության ոլորտում գրանցվել է 8.6% անկում։

Իսկ գյուղատնտեսության տվյալները հրապարակվում են միայն եռամսյակային պարբերականությամբ։

Հունվար-ապրիլին ՏԱՑ-ը նվազել է 1.7%-ով

Այս տարվա առաջին չորս ամիսների հաշվարկով՝ հունվար-ապրիլին, նախորդ տարվա նույն ժամանակաշրջանի համեմատ, Հայաստանի տնտեսական ակտիվության ցուցանիշը կրճատվել է 1.7%-ով։

Արդյունաբերական արտադրանքի ծավալը չորս ամիսներին կազմել է 585 մլրդ դրամ ՝նախորդ տարվա հունվար-ապրիլի համեմատ աճելով 4.2%-ով։ Դա տեղի է ունեցել հունվար և փետրվար ամիսներին գրանցված աճերի շնորհիվ։

Շինարարության ծավալը 2020թ. հունվար-ապրիլին կազմել է 54 մլրդ դրամ՝ կրճատվելով 21.9%-ով։

Ներքին առևտրաշրջանառությունը կազմել է 816 մլրդ դրամ, անկումը՝ 8.6%։

Իսկ ծառայությունների ծավալը 585 մլրդ դրամ է, աճը՝ 0.1%:

• Տնտեսական ակտիվության ցուցանիշը մարտին 4.9 %-ով նվազել է. ամենամեծ անկումը շինարարության ոլորտում է