Մայիսին Եվրամիությունում նոր արտադրված ավտոմեքենաների վաճառքը կրկնակի կրճատվել է
COVID-19 կորոնավիրուսը շարունակում է ազդել ԵՄ ավտոշուկայի վրա։ Մայիսին Եվրամիությունում վաճառվել է միայն 581 161 մարդատար նոր ավտոմեքենա։ Թվերը հայտնի են դարձել Եվրոպական ավտոարտադրողների ասոցիացիայի հրապարակած տվյալներից։ Վերջինս հրապարակվել է չորեքշաբթի օրը՝ հունիսի 17-ին։
Գերմանական Deutsche Welle-ն նշում է, որ հրապարակված ցուցանիշը 52,3 %-ով պակաս է, քան 2019 թվականի մայիս ամսվա ցուցանիշները, չնայած կարանտինային սահմանափակումների թուլացմանը։ Մայիս ամսին ավտոմեքենաների վաճառքը հիմնականում անկում է գրանցել այն երկրներում, որոնք ամենաշատն են տուժել կորոնավիրուսի համավարակից և առավել խիստ սահմանափակումներ կիրառել երկրի ներսում։ Այդ երկրների թվում են Իսպանիան (-72,7 % անկում), Ֆրանսիան (-50,3 % անկում), Իտալիան (-49,6 % անկում): Գերմանիայում նոր մարդատար ավտոմեքենաների վաճառքի անկումը կազմել է 49,5 %:
2020 թվականի առաջին հինգ ամիսներին Եվրոպական Միությունում այդ ցուցանիշը կրճատվել է 41,5 %-ով, համեմատած 2019 թվականի նույն ժամանակաշրջանի հետ։ Ընդ որում, ապրիլի անկումը դարձել է ամենամեծը՝ ACEA-ի կողմից վարվող վիճակագրության ողջ ընթացքում։
Վերջին տվյալներով աշխարհում կորոնավիրուսի վարակակիրների թիվը հասել է շուրջ 8 միլիոն 313 հազարի։ Մահացել է մոտ 447 000 մարդ, իսկ ապաքինվածների թիվը հասել է 4 միլիոն 353 հազարի։ Կորոնավիրուսից ամենաշատ տուժած երկիրը շարունակում է մնալ Միացյալ Նահանգները։
Լուսանկարը՝ Peter Juelich/Bloomberg News
Մեկնաբանել