Երեկ լրագրողների հարցերին պատասխանել է Խաչատուր Սուքիասյանը

ՀԱԿ-ի համամասնական ցուցակում կլինե՞ք:

Այդ հարցը ես Լևոն Տեր-Պետրոսյանի հայեցողությանն եմ թողել: Որպես առաջնորդ նա կորոշի: Եթե այդ որոշումը կայացվի, բոլորս տեղյակ կլինենք:

Հնարավո՞ր է, որ ԱԺ-ում ստեղծեք գործարար պատգամնավորների խումբ, թե՞ ՀԱԿ-ի խորհրդարանական խմբակցության անդամ կմնաք:

Ես կարծում եմ, որ ավելի ճիշտ կլինի քաղաքական համակարգ լինի ներկայացված: Կարծում եմ՝ գործարարները չեն կարող այդ քաղաքական պլատֆորմն ապահովել: Այդ հարթակը չի ստացվի միայն գործարարների մոտ, այդտեղ պետք է քաղաքական համակարգ լինի, կուսակցություն, միավորում կամ ինչ-որ դաշինք լինի, որ կարողանա պատշաճ կերպով խնդիրները լուծել:

ՀԱԿ-ը հայտարարել էր, որ քաղաքականությունն ու գործարարությունն անհամատեղելի են: Դուք դա ինչպե՞ս եք գնահատում, և ակնկալո՞ւմ եք, որ ՀԱԿ-ը ձեզ պետք է աջակցի:

Էստեղ պետք է էդ սահմանը ճիշտ հասկանանք: Շատ ճիշտ հարց են առաջ քաշել ՀԱԿ-ի իմ գործընկերները: Ամբողջ քաղաքակիրթ աշխարհում բոլորը բաժնետերեր են, ցանկացած հայտնի ընտանիք՝ մինչև անգամ նախագահներ, վարչապետներ, նախարարարներ. բոլորը բաժնետեր են: Բայց այնտեղ այդ բաժնետերերը մասնակցություն չունեն դրանց կառավարմանը: ՀՀ-ում. գուցե որպես փոքր երկիր, տնտեսության միավորները նույնպես փոքր են, շատ ժամանակ նրանք (գործարարները) մասնակցում են այդ կառավարմանը: Այնպիսի մարդիկ են պետք, որոնք կառավարման հետ կապ չունենան և չկարողանան միաևնույն ժամանակ կառավարել այն տնտեսական համակարգը, որ ունեն և միևնույն ժամանակ լինեն ԱԺ պատգամավոր: Կարծում եմ՝ ՀԱԿ-ը նկատի է ունեցել դա: 

Խորհրդարանում բազմաթիվ գործարարներ կան: Դուք կարծում եք` նրանք օգտակա՞ր են օրենսդրի աշխատանքներում:

Ես չեմ կարող այդպես ասել, նման չափիչ գործիք չունեմ: Ես ինքս և ինձ նման շատերը գործարար են եղել և հետո հայտնվել են ԱԺ-ում, եղել են շատ խելացի մարդիկ, շատ բանիմաց մարդիկ, պրոֆեսիոնալներ, և կան մարդիկ, որոնց չեմ ճանաճում, չեմ շփվել, չեմ կարող գնահատական տալ:

Դուք աջակցելո՞ւ եք ՀԱԿ-ին` մասնավորապես ֆինանսապես, ինչը կարծեմ եղել է նաև 2008 թ.-ին:

Ես չեմ կարծում, թե դուք ինձ հետ եք եղել և տեսել եք, որ ես ֆինանսապես աջակցել եմ: Ես այն տնտեսական քաղաքական գործիչն եմ, որը պետք է ոչ թե ֆինանսապես աջակցի, այլ իմ ունեցած պոտենցիալով, իմ ունեցած հնարավորություններով: Ինձ դուր էլ չի գալիս, որ ինձ պետք է դիտեն որպես ֆինանսական աջակցողի:

Հերքո՞ւմ եք, որ նախորդ ընտրություններին ֆինանսապես աջակցել եք ՀԱԿ-ին:

Այո, ես հերքում եմ, որ  ես ֆինանսապես աջակցել եմ: Ես` որպես Խաչատուր Սուքիասյան, եղել եմ այդ շարժման անդամ:

Ձեր պոտենցիալ մրցակիցը համարում են Նուշիկյանին, ով հայտնի է իր կապերով` մասնավորապես գլխավոր դատախազի հետ ունեցած խնամիական կապերով: Այս առումով Ձեզ մտահոգող ինչ-որ հանգամանք կա՞:

Ինձ միայն մի հարց է մտահոգում, որ գլխավոր դատախազն իրավունք չունի քաղաքականությամբ զբաղվելու:

Իրենը հասարակական կառույցն է` «Նիգ-Ապարանը»:

Նիգ-Ապարանով էլ իրավունք չունի զբաղվելու: Նա պետք է լինի զուտ ՀՀ գլխավոր դատախազը: Այսքանը:

Ինչպե՞ս եք պատկերացնում ձեր հետագա գործունեությունը. գործարարությունը թողնելու եք, զբաղվեք օրենսդրությմա՞բ:

Ես գործարարությամբ չեմ զբաղվում, բայց ես ամեն օր պետք է ուսումնասիրեմ, հասկանամ` ինչ է կատարվում, ես ունեմ կապեր, ես ինքս ցանկանում եմ շատերի հետ խոսալ, հասկանալ` ինչ է կատարվում: Այո, ես պետք է բոլորի հետ կապ ունենամ, շփվեմ, բայց ես ընդհանրապես տնտեսական գործունեությամբ չեմ զբաղվում: Երբ Սահմանադրությունը սահամնեց, որ պետք է չզբաղվել, ես օրենքը ճիշտ ընդունեցի, առաջինը ես հրաժարվեցի: Մեծ ընտանիք ունենք, ես եղբայրներ ունեմ, խորհրդակցում ենք, ես իմ կարծիքն եմ հայտնում, բայց իմ կարծիքը չեմ պարտադրում: Ես ինքս անձամբ սեփականատեր եմ, ես ավելի շատ սիրում եմ օրենսդրական գործունեությունը, ես ավելի շատ սիրում եմ տնտեսական քաղաքականությունը: Ես ավելի մեծ հաճույք դրանից եմ ստանում:

Շահարկումներ կան, որ վերջին շրջանում հանրահավաքներին չեք մասնակցում: Ի՞նչն է պատճառը:

Ես տնտեսական քաղաքականության մասնագետ եմ, շատ դեպքերում պետք է լինեմ այլ երկրներում: Չի ստացվել այդ օրերին այստեղ լինեմ, գամ: Ես Խաչատուր Սուքիասյանն եմ, որոշում եմ` այսօր գնում եմ հանրահավաքի, որոշում եմ` չեմ գնում: Հայաստանում լինեմ, կգնամ հանրահավաքի, շահարկում ի՞նչ է նշանակում:

Այսինքն` այնպես չէ՞, որ Լևոն Տեր-Պետրոսյանը նեղացել է Ձեզանից: 

Ոչ ես եմ Լևոն Տեր-Պետրոսյանից նեղացել, ոչ ինքն է ինձանից նեղացել: Ես երեկ իրա հետ եմ եղել, իր հետ հանդիպել եմ: Ես երբ գալիս եմ, Լևոն Տեր-Պետրոսյանի հետ միշտ հանդիպում եմ: 

Էլ ո՞ւմ եք հանդիպում: 

Ես միայն Լևոն Տեր-Պետրոսյանի հետ եմ հաճախ հանդիպում, և իմ գործընկերների հետ` ՀԱԿ-ից: Ոչ ՀԱԿ-ից էլ ունեմ գործընկերներ, հանդիպում եմ: Բոլոր գործարարների նկատմամբ շատ բարի եմ տրամադրված, շատ ընկերական եմ տրամադրված, և ես էդքան գիտակցություն ունեմ` հասկանալու, որ գործարարից ոչինչ կախված չէ: Ես ոչ մեկի նկատմամբ խնդիր չունեմ: