ԱՄՆ-ում կտրուկ սրվել է կորոնավիրուսով պայմանավորված իրավիճակը
ԱՄՆ-ում կրկին սրվել է կորոնավիրուսով պայմանավորված իրավիճակը։ Ջոնս Հոփքինսի համալսարանի տվյալներով՝ վերջին մեկ օրվա ընթացքում երկրում հայտնաբերվել է COVID-19 տիպի կորոնավիրուսով հիվանդության 35 900 նոր դեպք, ինչը հավասար է ԱՄՆ-ում համավարակի պիկի ժամանակ (ապրիլ ամսին), գրանցված ցուցանիշին։ «Worldometer» կայքի տվյալների համաձայն ևս ցուցանիշը գերազանցել է 38 000-ը։
Առավել ծանր է վիճակը ԱՄՆ հարավում։ Նյու Յորք, Նյու Ջերսի և Կոնեկտիկուտ նահանգները կարանտինային ռեժիմ են սահմանել հարավային նահանգներից ժամանող քաղաքացիների համար, այդ թվում Ալաբամա, Արկանզաս, Արիզոնա, Ֆլորիդա, Հավարային Կարոլինա և Տեխաս նահանգների։
Նյու Յորքի նահանգապետ Էնդրյու Կուոմոն հայտարարել է, որ համավարակի պատճառով առավել շատ տուժած շրջաններից ժամանածները կարող են իրենց հետ բերել վարակը։ «Պետք է նայել ճշմարտության աչքերին։ Ժխտումը կենսական ռազմավարություն չէ»,- հավելել է Կուոմոն։ Կարանտինային ռեժիմի խախտման համար օրինախախտները կտուգանվեն 2000 ԱՄՆ դոլարի չափով, իսկ երկրորդ անգամ խախտելու դեպքում՝ 5000 ԱՄՆ դոլար։
Ջոնս Հոփքինսի համալսարանի տվյալներով՝ ԱՄՆ-ում կորոնավիրուսով վարակվածների ընդհանուր թիվը հասել է գրեթե 2,4 միլիոնի։ Կորոնավիրուսից մահացածների թիվը կազմում է 122 000։ Միացյալ Նահանգները գլխավորում է այն երկրների ցանկը, որոնք ամենից շատն են տուժել կորոնավիրուսից։ Վերջին երկու շաբաթների ընթացքում նահանգների գրեթե կեսում գրանցվել է վարակման նոր դեպքերի կտրուկ աճ։ Փորձագետները սա բացատրում են սահմանափակող միջոցառումների ժամանակից շուտ թուլացմամբ։
Լուսանկարը՝ REUTERS/Lucas Jackson
Մեկնաբանել