Հունիսի 26-ից ԵԱՏՄ տարածքում իրացվող ապրանքների վրա, որոնք պարունակում են գենետիկորեն մոդիֆիկացված օրգանիզմներ, պարտադիր պետք է նշվի այդ մասին։

Երեկ արդեն ավարտվեց անցումային շրջանը, որով ուժի մեջ մտան ՄՄ ՏԿ 022/2011 «Պարենային ապրանքն իր մակնշման մասով» տեխնիկական կանոնակարգում կատարված փոփոխությունները։

Այդ փոփոխությունները, մասնավորապես, ընդունվել էին դեռևս 2017 թ. դեկտեմբերի 20-ին՝ № 90 որոշմամբ և ուժի մեջ էին մտել 2018 թ. դեկտեմբերի 26-ին։ 

 ԳՄՕ- գենետիկորեն ձևափոխված օրգանիզմներ (բույսեր, կենդանիներ, միկրոօրգանիզմներ), որոնց փոխպատվաստել են այլ օրգանիզմների գեներ և նրանց գենոտիպն արհեստականորեն փոփոխվել է։

Գենային փոփոխությունները, որպես կանոն, կատարվում են գիտական և տնտեսական նպատակներով։ Ի տարբերություն բնական կամ արհեստական մուտացիաների ժամանակ առաջացող պատահական փոփոխությունների՝ գենային ձևափոխումն ունի խիստ նպատակային ուղղվածություն։

Ներկայում գենային ձևափոխման հիմնական եղանակը տրանսգենների օգտագործումն է՝ տրանսգենային օրգանիզմների ստեղծման նպատակով։ Գյուղատնտեսության և սննդարդյունաբերության մեջ ԳՄՕ ասելով՝ հասկանում են միայն այն օրգանիզմները, որոնք առաջացել են նրանց գենոմում մեկ կամ մի քանի տրանսգենների ներմուծմամբ:

2020թ հունիսի 26-ից սկսած՝ գենետիկորեն մոդիֆիկացված օրգանիզմների կիրառմամբ պատրաստված սննդամթերքի մակնշման վրա «ԳՄՕ» նշումը պետք է պարտադիր լինի պիտակի վրա, ընդ որում՝ նույն ձևով, չափով և տառատեսակով, ինչ EAC (Eurasian Conformity)` Եվրասիական համապատասխանության նշանը։

Տեխնիկական կանոնակարգը չի պահանջում «ԳՄՕ» մակնշում այն դեպքում, երբ արտադրողը չի օգտագործել գենետիկորեն մոդիֆիկացված ապրանք, սակայն հետագայում այդ ապրանքի մեջ հայտնաբերվել է ԳՄՕ-ն։ Նման դեպքում, եթե այն չի գերազանցում 0,9 %-ը, համարվում է պատահական կամ տեխնիկական անբաժանելի խառնուրդ։

Թույլատրվում է մինչև պիտանելիության ժամկետի ավարտն իրացնել գենետիկորեն մոդիֆիկացված օրգանիզմների օգտագործման արդյունքում արտադրված այն պարենային ապրանքները, որոնք թեև չունեն ԳՄՕ նշան, սակայն պահպանել են Միության տեխնիկական կանոնակարգերով սահմանված ​​մակնշման անհրաժեշտ պահանջները՝ ներառելով պատշաճ տեղեկություններ այդ մասին։

Նշենք, որ Եվրոպական միության տարածքում կա 174 տարածք (զոնա), որտեղ ԳՄՕ-ներ չեն օգտագործում։ Իսկ մի շարք երկրներում դրանց կիրառման սահմանափակումներ կան։ Օրինակ՝ Ավստրիան, Վենեսուելան, Հունաստանը, Լեհաստանն ու Շվեյցարիան համարվում են ԳՄՕ-ներից ազատ պետություններ։