Գլխավոր դատախազությունում ուսումնասիրում են «սոցապի» տների գնման մասին «Հետքի» հրապարակումը
Գլխավոր դատախազության պետական շահերի պաշտպանության վարչությունը ուսումնասիրում է «Հետք»-ի՝ «Սոցապը 6 ամիս առաջ «հրատապ» կարգով տարեցների համար տներ է գնել, սակայն դրանք մինչ օրս բնակեցված չեն» հոդվածում մատնանշված փաստերը: Այդ մասին ասաց դատախազության հանրային կապերի բաժնի պետ Արևիկ Խաչատրյանը:
Հիշեցնենք, որ հրապարակված հոդվածում անդրադարձել էինք Արմավիրի մարզի Մրգաստան, Ակնաշեն և Գեղակերտ համայնքներում, տարեցների խնամքի ծառայությունների մատուցումը բարելավելու անհրաժեշտությունից ելնելով, 3 տան գնման պատմությանը: Նշել էինք, որ Աշխատանքի և սոցիալական հարցերի նախարարությունը Արմավիրի մարզում ձեռք բերած 2 փոքր տան գնումն իրականացրել է «հրատապ մեկ անձ» գնման ընթացակարգով և վճարել համեմատաբար թանկ գին, քանի որ գնված տները լուրջ վերանորոգման կարիք ունեն:
Ավելին, տները նախապես չեն գնահատվել, և նախարարությունը դրանք ձեռք է բերել այն գնով, ինչ առաջարկել է վաճառողը՝ պահելով միայն վերին՝ 27 մլն դրամի շեմը:
Ակնաշեն գյուղի տունը և տնամերձ հողամասը 2019թ. դեկտեմբերի 19-ին կնքված պայմանագրով ձեռք է բերվել 26 մլն 950 հազար դրամով՝ ընդամենը 50 հազար դրամ պակաս նախարարության առաջարկած առավելագույն գնից: Իսկ Մրգաստան համայնքում գտնվող տունը գնվել է 26 մլն 730 հազար դրամով՝ 270 հազար դրամով պակաս նախարարության առաջարկած առավելագույն գնից:
Երկու տներն էլ ձեռք են բերվել նույն օրը՝ մատակարարման մեկ պայմանագրով, որի կողմերից մեկը նախարարությունն է, իսկ մյուսը՝ «Լեքսհաբ» ՍՊԸ-ն:
2019թ-ի մարտի 19-ին «Լեքսհաբ» ընկերության 100% բաժնեմասի սեփականատեր է դարձել Պավել Թադևոսյանը: Նա է նաև ընկերության տնօրենը: Պավել Թադևոսյանը Երևան քաղաքի ընդհանուր իրավասության դատարանի դատավոր Սիմիզար Հովսեփյանի որդին է:
Թեև տները հրատապ ընթացակարգով են ձեռք բերվել, ինչը ենթադրում է որոշակի շտապողականություն, լուրջ մրցակցության բացակայություն և այլն, սակայն մինչ օրս՝ գնումից 6 ամիս անց, դրանք վերանորոգված և բնակեցված չեն:
Լուսանկարում Մրգաստան գյուղում գնված տան առաջին հարկն է
Մեկնաբանել